ប្រជាជនប៉ាឡេស្ទីននៅក្នុងទីក្រុង Khan Younis បានបង្ហាញក្តីសង្ឃឹមរបស់ពួកគេកាលពីថ្ងៃអាទិត្យ ទី៩ ខែមីនា សម្រាប់ការចរចាដោយជោគជ័យរវាងក្រុមហាម៉ាស និងអ៊ីស្រាអែល ហើយបានអំពាវនាវឱ្យបញ្ចប់សង្គ្រាមនៅតំបន់ហ្កាហ្សា។

អ៊ីស្រាអែល និងក្រុមហាម៉ាស បានចុះហត្ថលេខាកាលពីថ្ងៃសៅរ៍ សប្តាហ៍មុន ដែលពួកគេកំពុងត្រៀមសម្រាប់ដំណាក់កាលបន្ទាប់នៃការចរចាបទឈប់បាញ់ ខណៈអ្នកសម្របសម្រួលបានជំរុញឆ្ពោះទៅរកការចរចាដើម្បីបន្ថែមពេលបទឈប់បាញ់មានរយៈពេល៤២ថ្ងៃដ៏ផុយស្រួយ ដែលបានចាប់ផ្តើមកាលពីក្នុងខែមករា។

ស្រ្តីប៉ាឡេស្ទីនដែលបានភៀសខ្លួន និយាយថា «យើងចង់មានជីវិតរស់នៅ និងរស់នៅក្នុងសន្តិភាព។ ប្រជាជនជាច្រើនរងទុក្ខដូចយើងដែរ ប្រជាជាតិទាំងពីរកំពុងឈឺចាប់។ ការចរចា ត្រូវតែទទួលបានជោគជ័យ ទោះបីជាមានឧបសគ្គច្រើនក៏ដោយ។ វាត្រូវតែជោគជ័យ ព្រោះថាតើនៅសល់អ្វី? តំបន់ហ្កាហ្សា ពុំមានអ្វីនៅសេសសល់ទេ។

គណៈប្រតិភូក្រុមហាម៉ាស បានជួបប្រជុំគ្នាក្នុងរយៈពេលពីរថ្ងៃកន្លងទៅនេះ ជាមួយអ្នកសម្របសម្រួលរបស់ប្រទេសអេហ្ស៊ីប ហើយបានអះអាងសារជាថ្មីអំពីការត្រៀមខ្លួនរបស់គេក្នុងការចរចាអំពីការអនុវត្តដំណាក់កាលទីពីរនៃកិច្ចព្រមព្រៀងនេះ។ អ៊ីស្រាអែល បាននិយាយថា ខ្លួនបានបញ្ជូនអ្នកចរចាទៅកាន់ទីក្រុងដូហា នៅថ្ងៃចន្ទ ទី១០ មីនានេះ សម្រាប់ការចរចាបទឈប់បាញ់។