បេសកកម្មរបស់ប្រទេសអ៊ីរ៉ង់ប្រចាំអង្គការសហប្រជាជាតិ បាននិយាយកាលពីថ្ងៃអាទិត្យថា ការចរចាដើម្បីលុបបំបាត់កម្មវិធីនុយក្លេអ៊ែរដោយសន្តិវិធីរបស់ខ្លួន «នឹងមិនកើតឡើងឡើយ»។

នៅក្នុងសេចក្តីថ្លែងការណ៍មួយនៅលើវេទិកាប្រព័ន្ធផ្សព្វផ្សាយសង្គម X បេសកកម្មនេះ បានលើកឡើងថា អ៊ីរ៉ង់អាចនឹងពិចារណាលើការពិភាក្សា ដើម្បីដោះស្រាយការព្រួយបារម្ភលើសកម្មភាពយោធាដែលមានសក្តានុពលនៃសកម្មភាពនុយក្លេអ៊ែររបស់ខ្លួន ប៉ុន្តែបានច្រានចោលការពិភាក្សាណាមួយ ដែលមានគោលបំណងលុបបំបាត់កម្មវិធីនុយក្លេអ៊ែរស៊ីវិលរបស់ខ្លួន។

ប្រធានាធិបតីអាមេរិកលោក ដូណាល់ ត្រាំ (Donald Trump) បានប្រាប់បណ្តាញព័ត៌មាន Fox Business ក្នុងបទសម្ភាសន៍មួយដែលបានចាក់ផ្សាយកាលពីថ្ងៃសុក្រថា លោកចង់ចរចាជាមួយអ៊ីរ៉ង់អំពី បញ្ហានុយក្លេអ៊ែរ ហើយបានផ្ញើលិខិតមួយ ទៅកាន់មេដឹកនាំអ៊ីរ៉ង់។ បេសកកម្មអង្គការសហប្រជាជាតិរបស់អ៊ីរ៉ង់ បាននិយាយកាលពីថ្ងៃសុក្រថា ខ្លួនមិនបានទទួលលិខិតបែបនេះទេ។

ប្រទេសអ៊ីរ៉ង់ បានចុះហត្ថលេខាលើផែនការសកម្មភាពគ្រប់ជ្រុងជ្រោយរួម (JCPOA) ជាមួយប្រទេសមហាអំណាចក្នុងឆ្នាំ ២០១៥ ដោយយល់ព្រមកាត់បន្ថយកម្មវិធីនុយក្លេអ៊ែររបស់ខ្លួន ជាថ្នូរនឹងការបន្ធូរបន្ថយទណ្ឌកម្ម។ សហរដ្ឋអាមេរិក បានដកខ្លួនចេញពីកិច្ចព្រមព្រៀងនេះ ក្នុងឆ្នាំ ២០១៨ ក្រោមការដឹកនាំរបស់លោក ត្រាំ និងបានដាក់ទណ្ឌកម្មឡើងវិញ ដែលជំរុញឲ្យអ៊ីរ៉ង់កាត់បន្ថយការប្តេជ្ញាចិត្តរបស់ខ្លួន។

កិច្ចខិតខំប្រឹងប្រែងដើម្បីស្តារកិច្ចព្រមព្រៀងនេះ មានការរីកចម្រើនតិចតួច។ មន្ត្រីអ៊ីរ៉ង់បាននិយាយម្តងហើយម្តងទៀតថា ក្រុងតេអេរ៉ង់ នឹងមិនចរចាក្រោមសម្ពាធ ឬទណ្ឌកម្មទេ។