សម្ព័ន្ធមិត្តដ៏សំខាន់របស់ប្រធានាធិបតីទួរគី លោក រ៉េសិប តាយីប អឺដូហ្កាន់ ( Recep Tayyip Erdogan) បាននិយាយកាលពីថ្ងៃអាទិត្យថា៖«ក្រុមពាក់ព័ន្ធទាំងអស់»នៃក្រុមសកម្មប្រយុទ្ធឃើដ ( PKK) ត្រូវតែទម្លាក់អាវុធ ដែលជាផ្នែកនៃកិច្ចព្រមព្រៀងបទឈប់បាញ់ជាប្រវត្តិសាស្ត្រជាមួយទីក្រុងអង់ការ៉ា។

លោក Abdullah Ocalan ដែលជាមេដឹកនាំជាប់ពន្ធនាគារនៃគណបក្សពលករឃើដឬ PKK កាលពីខែមុន បានអំពាវនាវឲ្យក្រុមរបស់ខ្លួនរំសាយចោល និងបញ្ចប់ការតស៊ូប្រដាប់អាវុធជាង ៤ទសវត្សរ៍ ប្រឆាំងនឹងប្រទេសទួរគី។

ប៉ុន្តែទីក្រុងអង់ការ៉ាក៏ចង់ឲ្យយុទ្ធជន PKK ដែលនៅគ្រប់ទីកន្លែង ទម្លាក់អាវុធទាំងអស់ ជាពិសេសនៅក្នុងកងកម្លាំងប្រជាធិបតេយ្យស៊ីរី (SDF) ដែលភាគច្រើន ត្រូវបានបង្កើតឡើងដោយអង្គភាពការពារប្រជាជនឃើដ ឬ YPG ។

ថ្នាក់ដឹកនាំរបស់កងកម្លាំងប្រជាធិបតេយ្យស៊ីរី (SDF) បានស្វាគមន៍ចំពោះការអំពាវនាវរបស់លោក Ocalan កាលពីថ្ងៃទី ២៧ ខែកុម្ភៈ ឲ្យរំសាយក្រុមនេះចោល ប៉ុន្តែបាននិយាយថា មិនមែនអនុវត្តចំពោះកងកម្លាំងរបស់ខ្លួនទេ។

លោក Devlet Bahceli ប្រធានគណបក្សជាតិនិយម MHP បាននិយាយថា៖«អង្គការភេរវកម្ម PKK និងក្រុមពាក់ព័ន្ធ ត្រូវតែទម្លាក់អាវុធរបស់ពួកគេ ជាបន្ទាន់ និងដោយគ្មានបុរេលក្ខខណ្ឌ»។

លោក Bahceli ត្រូវបានគេចាត់ទុកថា ជាអ្នកឧបត្ថម្ភសំខាន់នៃកិច្ចចរចារវាងក្រុងអង់ការ៉ា និងក្រុមសកម្មប្រយុទ្ធ PKK បន្ទាប់ពីលោកបានផ្តល់នូវកាយវិការសន្តិភាពដ៏គួរឲ្យភ្ញាក់ផ្អើល ប្រសិនបើលោក Ocalan បដិសេធអំពើហិង្សានោះ។