អតីតនាយករដ្ឋមន្ត្រីអូស្ត្រាលី លោក Malcolm Turnbull បាននិយាយថា ការប្រព្រឹត្តិមិនល្អរបស់រដ្ឋបាលលោក Donald Trump ចំពោះសម្ព័ន្ធមិត្តផ្សេងៗ និងស្ថាប័នសកល កំពុងជួយផ្តល់ «ឱកាស» ឲ្យប្រធានាធិបតីចិន ដោយលោកបានបន្ថែមថា ទីក្រុងកង់បេរ៉ាចាំបាច់ត្រូវព្យាយាមអនុវត្តគោលនយោបាយការពារជាតិឯករាជ្យបន្ថែមទៀត ខណៈដែលទីក្រុងវ៉ាស៊ីនតោន កាន់តែបង្ហាញភាពមិនគួរឲ្យទុកចិត្តបានខ្លាំងឡើងៗ។

លោក Turnbull ដែលបានដឹកនាំប្រទេសអូស្ត្រាលីពីឆ្នាំ២០១៥ ដល់ឆ្នាំ២០១៨ បាននិយាយថា ពិភពលោកកំពុងមើលឃើញនូវជំនាន់ «ដ៏រឹងត្អឹង» មួយកាន់តែខ្លាំងឡើងៗរបស់លោក Trump នៅក្នុងអាណត្តិទី២ នេះ ហើយថា អាកប្បកិរិយារបស់លោក នឹងត្រូវបានចាត់ទុកថា ជាការផ្ដល់ «អត្ថប្រយោជន៍» ដល់ប្រធានាធិបតីចិន លោក ស៊ី ជីនពីង (Xi Jinping) សម្រាប់ទំនាក់ទំនងអន្តរជាតិ ក្នុងរយៈពេល ៤ឆ្នាំខាងមុខ។

នៅក្នុងបទសម្ភាសន៍ជាមួយទូរទស្សន៍ Bloomberg ក្នុងទីក្រុងស៊ីដនី នាថ្ងៃចន្ទ (ទី១០ ខែមីនា) នេះ លោក Turnbull បានប្រាប់ថា៖ «លោកប្រធានាធិបតី ស៊ី ច្បាស់ណាស់នឹងធ្វើអ្វីផ្ទុយពីលោក Trump។ ក្នុងស្ថានភាពដែល Trump បង្កភាពច្របូកច្របល់ លោក ស៊ី នឹងបង្ហាញភាពនឹងនរ។ ក្នុងស្ថានភាពដែលលោក Trump មិនគោរព និងបំពាន លោក ស៊ី នឹងផ្ដល់ការគោរព។ ក្នុងស្ថានភាពដែលលោក Trump មានភាពរេចុះឡើង លោក ស៊ី នឹងមានភាពនឹងធឹង»។

តាមរយៈវិធីសាស្រ្តនោះ លោក Turnbull បានពន្យល់បន្ថែមថា នឹងមានប្រទេសមួយចំនួន ដែលប្រៀបធៀបចិន ជាមួយនឹងវិធានការរបស់លោក Trump ហើយនឹង «ចាត់ទុកថា ប្រទេសចិនជាដៃគូដ៏គួរឲ្យទាក់ទាញជាង»។

ដោយបង្ហោះលើកម្មវិធីបណ្ដាញសង្គម TruthSocial របស់លោក ពោលគឺភ្លាមៗបន្ទាប់ពីកិច្ចសម្ភាសន៍នោះ លោក Trump បានលើកឡើងថា លោក Turnbull «មិនដែលបានដឹងពីអ្វីដែលកំពុងកើតឡើង នៅក្នុងប្រទេសចិននោះទេ ហើយលោកក៏មិនមានសមត្ថភាពយល់បានដែរ»៕