ប្រធានាធិបតីចិន លោក ស៊ី ជីនពីង (Xi Jinping) បានអំពាវនាវដល់បណ្ដាមន្ត្រីយោធាជាន់ខ្ពស់ទាំងអស់ ឲ្យលើកកម្ពស់នូវវិធានការត្រួតពិនិត្យ ដើម្បីជួយស៊ើបអង្កេត និងដោះស្រាយករណីនៃអំពើពុករលួយ ជាអាទិភាពចម្បងមួយ ខណៈលោកសម្លឹងដល់ការពង្រឹងការអភិវឌ្ឍកងកម្លាំងប្រដាប់អាវុធរបស់ប្រទេស។

យោងតាមសេចក្ដីរាយការណ៍របស់ទីភ្នាក់ងារសារព័ត៌មានចិន Xinhua កាលថ្ងៃទី៧ ខែមីនា ដោយដកស្រង់សុន្ទរកថារបស់លោក នៅឯសភាប្រជាជនជាតិ ក្នុងទីក្រុងប៉េកាំង បានឲ្យដឹងថា អំឡុងពេលថ្លែងទៅកាន់គណៈប្រតិភូមកពីកងទ័ពរំដោះប្រជាជន និងកងកម្លាំងនគរបាលប្រដាប់អាវុធប្រជាជន លោក ស៊ី បានសង្កត់ធ្ងន់ថា ការត្រួតពិនិត្យគួរតែដើរតួនាទីឲ្យខ្លាំងក្លាជាងនេះបន្ថែមទៀត ក្នុងនោះរួមទាំងដំណើរការសវនកម្មកាន់តែប្រសើរឡើងផងដែរ។

ការលុបបំបាត់អំពើពុករលួយ ក្នុងរដ្ឋាភិបាល គឺជាអាទិភាពចម្បង សម្រាប់លោក ស៊ី ចាប់តាំងពីលោកឡើងកាន់អំណាច ក្នុងឆ្នាំ២០១២។ យុទ្ធនាការប្រឆាំងអំពើពុករលួយ បានឈានទៅដល់ការចាប់ខ្លួនមន្ត្រីជាន់ខ្ពស់ក្នុងចំនួនដ៏ច្រើនបំផុត រយៈពេលប៉ុន្មានឆ្នាំចុងក្រោយនេះ។ ជាពិសេស យោធាចិនបានជួបប្រទះនឹងការដកមន្ត្រី និងឧត្តមសេនីយ៍ជាន់ខ្ពស់ជាច្រើនរូប។ 

បើយោងសេចក្ដីរាយការណ៍កាលពីថ្ងៃទី៧ ខែមីនានោះ បានឲ្យដឹងបន្ថែមថា ជាមួយគ្នានេះ លោក ស៊ី ក៏បានអំពាវនាវឲ្យយោធាលើកកម្ពស់ប្រសិទ្ធភាពចំណាយ និងការបែងចែកមូលនិធិ សម្រាប់វិស័យការពារជាតិ។ ក្នុងរបាយការណ៍មួយ ដែលត្រូវបានចេញផ្សាយកាលពីថ្ងៃទី៥ ខែមីនា ក្រសួងហិរញ្ញវត្ថុចិន បានលើកឡើងថា រដ្ឋាភិបាលក្រុងប៉េកាំង គ្រោងនឹងបង្កើនការចំណាយ ក្នុងវិស័យការពារជាតិប្រហែល ៧,២ភាគរយ ពោលគឺឡើងដល់ប្រហែល ១,៧៨សែនកោដិយន់ (២៤៥ពាន់លានដុល្លារ) ក្នុងឆ្នាំ២០២៥៕