បើយោងតាមរបាយការណ៍ដែលបានចេញផ្សាយនៅថ្ងៃចន្ទ (ទី១០ ខែមីនា) នេះ បណ្តាប្រទេសសមាជិករបស់អង្គការណាតូ (NATO) ក្នុងទ្វីបអឺរ៉ុប បាននាំចូលអាវុធច្រើនជាង ២ដង ក្នុងរយៈពេល ៥ឆ្នាំចុងក្រោយនេះ ដែលជាង ៦០ភាគរយជាការទិញសព្វាវុធរបស់សហរដ្ឋអាមេរិក។

ការរកឃើញដោយវិទ្យាស្ថានស្រាវជ្រាវសន្តិភាពអន្តរជាតិ Stockholm (SIPRI) កើតមានឡើងស្របជាមួយនឹងការប្រកាសរបស់សហភាពអឺរ៉ុប (EU) ដែលថា ពួកគេមានបំណងពង្រឹងសមត្ថភាពការពាររបស់ទ្វីប ដើម្បីឆ្លើយតបទៅនឹងការផ្លាស់ប្តូរគោលនយោបាយការបរទេសរបស់សហរដ្ឋអាមេរិក ក្រោមការដឹកនាំរបស់លោកប្រធានាធិបតី Donald Trump។

ហើយបើតាមរបាយការណ៍នោះ បានបង្ហាញថា ក្នុងអំឡុងឆ្នាំ២០២០ ដល់ឆ្នាំ២០២៤ អ៊ុយក្រែនបានក្លាយជាប្រទេសនាំចូលអាវុធធំបំផុតរបស់ពិភពលោក។ សហរដ្ឋអាមេរិកបានពង្រឹងជំហររបស់ខ្លួន ក្នុងនាមជាប្រទេសនាំចេញអាវុធធំជាងគេរបស់ពិភពលោក ដែលស្មើនឹង ៤៣ភាគរយនៃការនាំចេញសកល ដោយនាំមុខឆ្ងាយលើប្រទេសនាំចេញធំទី២ គឺប្រទេសបារាំងដែលមានចំនួន ៩,៦ភាគរយ។

ក្នុងរយៈពេលដូចគ្នានោះ ការនាំចូលអាវុធដោយសមាជិកណាតូអង្គការណាតូ នៅអឺរ៉ុប បានកើនឡើង ១០៥ភាគរយ បើធៀបនឹងរយៈពេល ៥ឆ្នាំមុននេះ។ លោក Mathew George ប្រធានកម្មវិធីផ្ទេរសព្វាវុធរបស់ស្ថាប័ន SIPRI បានប្រាប់ថា កម្រិតនោះឆ្លុះបញ្ចាំងពី «ការបំពាក់អាវុធឡើងវិញដែលកំពុងកើតឡើងក្នុងចំណោមរដ្ឋនានា នៅទ្វីបអឺរ៉ុប ដែលជាការឆ្លើយតបទៅនឹងការគំរាមកំហែងពីប្រទេសរុស្ស៊ី»។

សហរដ្ឋអាមេរិកបានផ្ដត់ផ្គង់ចំនួន ៦៤ភាគរយ ដោយកើនឡើងពីកម្រិត ៥២ភាគរយ ក្នុងរយៈពេលពីឆ្នាំ ២០១៥ ដល់ឆ្នាំ២០១៩។ អ្នកស្រាវជ្រាវជាន់ខ្ពស់ លោក Pieter Wezeman បាននិយាយថា «ដោយរុស្ស៊ីដែលកាន់តែមានភាពគឃ្លើនខ្លាំងឡើងៗ ហើយទំនាក់ទំនងឆ្លងមហាសមុទ្រអាត្លង់ទិកស្ថិតក្រោមភាពតានតឹង អំឡុងអាណត្តិដំបូងរបស់ប្រធានាធិបតី Trump រដ្ឋអង្គការណាតូ នៅអឺរ៉ុប បានចាត់វិធានការ ដើម្បីកាត់បន្ថយការពឹងផ្អែករបស់ពួកគេលើការនាំចូលអាវុធ និងដើម្បីពង្រឹងឧស្សាហកម្មអាវុធអឺរ៉ុប»៕