យោងតាមឯកអគ្គរដ្ឋទូតជាក់ស្ដែងប្រចាំទីក្រុងតៃប៉ិ បានឲ្យដឹងថា សហរដ្ឋអាមេរិក កំពុងព្យាយាមបង្កើនល្បឿនដល់ការដឹកជញ្ជូនអាវុធទៅកាន់កោះតៃវ៉ាន់ ជាការអត្ថាធិប្បាយដែលទំនងជាជួយបំបាត់ការព្រួយបារម្ភរបស់មន្ត្រី នៅទីក្រុងតៃប៉ិ បន្ទាប់ពីរដ្ឋបាលរបស់លោក Donald Trump ផ្អាកជំនួយយោធា សម្រាប់អ៊ុយក្រែន។

នៅក្នុងបទសម្ភាសន៍មួយជាមួយសារព័ត៌មាន Liberty Times នាយកវិទ្យាស្ថានអាមេរិក នៅកោះតៃវ៉ាន់ លោក Raymond Greene បាននិយាយថា៖ «យើងកំពុងធ្វើការយ៉ាងសកម្ម ដើម្បីបង្កើនល្បឿននៃពេលវេលាដឹកជញ្ជូន ពិសេសសម្រាប់គ្រឿងយុទ្ធោបរណ៍ដែលទាក់ទងនឹងសង្គ្រាមមិនស៊ីមេទ្រីគ្នា ខណៈនេះមានសារៈសំខាន់ជាពិសេស សម្រាប់ការការពារដែនកោះតៃវ៉ាន់»។

លោកបានបន្ថែមនៅក្នុងបទសម្ភាសន៍នោះថា៖ «ប្រសិនបើសង្រ្គាមនៅអ៊ុយក្រែនឈានដល់ទីបញ្ចប់ គេរំពឹងថា យើងនឹងផ្លាស់ប្តូរការផ្តោតអារម្មណ៍របស់យើងទៅកាន់តម្រូវការការពាររបស់កោះតៃវ៉ាន់វិញ»។ យ៉ាងណាក្ដី សារព័ត៌មាននេះមិនបានឲ្យដឹងថា តើកិច្ចសម្ភាសន៍នេះត្រូវបានធ្វើឡើងពីពេលណានោះទេ។

គួបញ្ជាក់ថា កោះតៃវ៉ាន់ពឹងផ្អែកលើការគាំទ្រផ្នែកយោធារបស់សហរដ្ឋអាមេរិក ដើម្បីទប់ទល់នឹងប្រទេសចិន ដែលចង់នាំយកកោះប្រកាន់លទ្ធិប្រជាធិបតេយ្យមានប្រជាជនចំនួន ២៣លាននាក់ឲ្យមកនៅក្រោមការគ្រប់គ្រងរបស់ខ្លួន នៅថ្ងៃណាមួយ ដោយកម្លាំងយោធានឹងត្រូវបានប្រើប្រាស់ ប្រសិនបើចាំបាច់។ លំហូរនៃអាវុធធុនធ្ងន់អាមេរិកទៅកាន់កោះតៃវ៉ាន់ ត្រូវបានកម្រិត ក្នុងរយៈពេលប៉ុន្មានឆ្នាំចុងក្រោយនេះ ដោយសារតែសហរដ្ឋអាមេរិកបានផ្តោតលើការគាំទ្រអ៊ុយក្រែន បន្ទាប់ពីការលុកលុយពេញបន្ទុករបស់រុស្ស៊ី។

ប្រទេសចិនបានបង្កើនសម្ពាធផ្នែកយោធារបស់ខ្លួន ចំពោះកោះតៃវ៉ាន់ ក្នុងរយៈពេលប៉ុន្មានឆ្នាំចុងក្រោយនេះ ក្នុងនោះរួមទាំងការធ្វើសមយុទ្ធធំៗជាច្រើនដង នៅជុំវិញកោះដ៏សំខាន់នេះផងដែរ៕