ក្រសួងការបរទេសចិន នៅថ្ងៃចន្ទ (ទី១០ ខែមីនា) នេះ បានប្រាប់ឲ្យដឹងថា ប្រទេសចិននឹងប្រឹងប្រែងអស់ពីលទ្ធភាព ដើម្បីសម្រេចបាននូវ «ការបង្រួបបង្រួមមួយប្រកបដោយសន្តិភាព» ជាមួយកោះតៃវ៉ាន់ ប៉ុន្តែនឹងចាត់វិធានការចាំបាច់ទាំងអស់ ដើម្បីការពារបូរណភាពដែនដីរបស់ប្រទេសចិន។

សូមបញ្ជាក់ថា ប្រទេសចិនទាមទារតៃវ៉ាន់ ដែលជាកោះស្វ័យគ្រប់គ្រងតាមបែបប្រជាធិបតេយ្យថា ជាផ្នែកនៃដែនដីរបស់ខ្លួន ទោះបីមានការជំទាស់ពីរដ្ឋបាលទីក្រុងតៃប៉ិក៏ដោយ។ ហើយមេដឹកនាំកោះតៃវ៉ាន់ លោក Lai Ching-te និយាយថា មានតែប្រជាជនកោះតៃវ៉ាន់ប៉ុណ្ណោះ ដែលអាចសម្រេចពីអនាគតរបស់ពួកគេបាន។

កាលពីសប្តាហ៍មុន នៅខាងក្រៅកិច្ចប្រជុំសភាប្រចាំឆ្នាំរបស់ចិន រដ្ឋមន្ត្រីការបរទេស លោក Wang Yi បានប្រាប់អ្នកសារព័ត៌មានថា កោះតៃវ៉ាន់នឹងមិនក្លាយជា «ប្រទេសមួយ» នោះទេ ហើយការគាំទ្រដល់ការមាន «ឯករាជ្យរបស់កោះតៃវ៉ាន់» គឺការជ្រៀតជ្រែកកិច្ចការផ្ទៃក្នុងរបស់ចិន។

នៅពេលត្រូវបានសួរអំពីសុន្ទរកថារបស់លោក Wang ពាក់ព័ន្ធនឹងកោះតៃវ៉ាន់ អ្នកនាំពាក្យក្រសួងការបរទេសចិន លោកស្រី Mao Ning បានប្រាប់ថា ប្រទេសចិន «មានឆន្ទៈ ក្នុងការប្រឹងប្រែងឲ្យអស់ពីលទ្ធភាពរបស់យើង ដើម្បីស្វែងរកនូវលទ្ធភាពនៃការបង្រួបបង្រួមដោយសន្តិភាព ប្រកបដោយភាពស្មោះត្រង់បំផុត»។

តែយ៉ាងណាក្ដី លោកស្រីបានបន្ថែមថា៖ «ក្នុងពេលជាមួយគ្នានេះ ប្រទេសចិននឹងចាត់វិធានការចាំបាច់ទាំងអស់ ដើម្បីការពារអធិបតេយ្យភាពជាតិ និងបូរណភាពដែនដី ហើយប្រឆាំងដាច់ខាត ចំពោះឯករាជ្យរបស់កោះតៃវ៉ាន់ និងការជ្រៀតជ្រែកពីខាងក្រៅ»។

ក្នុងរយៈពេលប៉ុន្មានឆ្នាំចុងក្រោយនេះ ទីក្រុងប៉េកាំងបានបង្កើនសម្ពាធយោធារបស់ខ្លួន ចំពោះកោះនេះ ក្នុងនោះរួមទាំងរៀបចំសមយុទ្ធជាច្រើនដង ដោយបន្តរក្សាលទ្ធភាពនៃការប្រើប្រាស់កម្លាំង ដើម្បីនាំយកកោះតៃវ៉ាន់ឲ្យមកស្ថិតនៅក្រោមការគ្រប់គ្រងរបស់ខ្លួន។ សហរដ្ឋអាមេរិក គឺជាអ្នកផ្គត់ផ្គង់អាវុធដ៏សំខាន់របស់កោះតៃវ៉ាន់ បើទោះបីជាមិនមានទំនាក់ទំនងការទូតផ្លូវការក៏ដោយ ប៉ុន្តែមិនមានសន្ធិសញ្ញាការពារដែនកោះនេះឡើយ ដែលមិនដូចប្រទេសជប៉ុន និងកូរ៉េខាងត្បូង៕