ប្រទេសរុស្ស៊ី បាននិយាយនៅថ្ងៃចន្ទថា ខ្លួនបានបណ្តេញ «អ្នកការទូត»ជនជាតិអង់គ្លេស ពីរនាក់ ពីបទសង្ស័យថា ធ្វើសកម្មភាពចារកម្ម។

ដោយប្រកាសពីការបណ្ដេញលេខាទី ២ របស់ស្ថានទូត និងស្វាមីរបស់លេខាទី១ សេវាសន្តិសុខ FSB របស់រុស្ស៊ី បាននិយាយថា ការងារប្រឆាំងការស៊ើបការណ៍ បានបង្ហាញពីវត្តមានចារកម្មអង់គ្លេស ដែលមិនបានប្រកាស នៅក្រោមការបិទបាំងរបស់ស្ថានទូតជាតិ។

សេវាសន្តិសុខនេះ បានបញ្ជាក់ថា អ្នកទាំងពីរ «បានផ្តល់ព័ត៌មានមិនពិតដោយចេតនា នៅពេលទទួលបានលិខិតអនុញ្ញាតឲ្យចូលប្រទេសរបស់យើង ដូច្នេះជាការរំលោភលើច្បាប់របស់រុស្ស៊ី»។

ចក្រភពអង់គ្លេស មិនបានឆ្លើយតបភ្លាមៗ ចំពោះការចោទប្រកាន់នេះទេ។

សេវាសន្តិសុខFSB បាននិយាយថា ក្រសួងការបរទេសរុស្ស៊ី បានដកហូតការទទួលស្គាល់របស់ពួកគេ ហើយបានបញ្ជាឲ្យពួកគេចាកចេញពីប្រទេសរុស្ស៊ី ក្នុងរយៈពេល ២សប្តាហ៍។

សេវាសន្តិសុខ បាននិយាយនៅក្នុងការបង្ហោះនៅលើបណ្តាញ Telegram ថា ក្រសួងក៏បានកោះអញ្ជើញតំណាងស្ថានទូតពាក់ព័ន្ធនឹងការចោទប្រកាន់នេះផងដែរ។

ទំនាក់ទំនងរវាងទីក្រុងមូស្គូ និងទីក្រុងឡុងដ៍ ត្រូវមានភាពតានតឹង ដោយរឿងអាស្រូវចារកម្មពេញរយៈពេលនៃការកាន់អំណាចរបស់ប្រធានាធិបតីរុស្ស៊ីលោក វ្ល៉ាឌីមៀ ពូទីន។

ចក្រភពអង់គ្លេស បានចោទប្រកាន់ទីក្រុងមូស្គូថា ជាអ្នកនៅពីក្រោយការធ្វើឃាតកាលពីឆ្នាំ ២០០៦ លើអតីតភ្នាក់ងាររុស្ស៊ី និងអ្នករិះគន់វិមានក្រឹមឡាំងលោក Alexander Litvinenko នៅក្នុងការវាយប្រហារដោយបំពុល នៅទីក្រុងឡុងដ៍។