អតីតប្រធានាធិបតីហ្វីលីពីន លោក Rodrigo Duterte បាននិយាយនៅឯទីក្រុងហុងកុងថា លោកបានត្រៀមខ្លួនរួចជាស្រេច សម្រាប់ការចាប់ខ្លួនណាមួយដែលអាចកើតមាន ចំពេលមានរបាយការណ៍ថា តុលាការឧក្រិដ្ឋកម្មអន្តរជាតិ (ICC) បានត្រៀមចេញដីកា ពាក់ព័ន្ធនឹង «សង្គ្រាមប្រឆាំងគ្រឿងញៀន» អស់រយៈពេលជាច្រើនឆ្នាំរបស់លោក ដែលបានសម្លាប់មនុស្សរាប់ពាន់នាក់។

គួររំលឹកថា «សង្គ្រាមប្រឆាំងគ្រឿងញៀន» គឺជាគោលនយោបាយយុទ្ធនាការដ៏សំខាន់ ដែលបានជួយរួមចំណែកឲ្យលោក Duterte ឡើងកាន់អំណាចក្នុងឆ្នាំ២០១៦ ក្នុងនាមបុគ្គលឯករាជ្យ ពោលគឺជាចៅហ្វាយក្រុងប្រឆាំងឧក្រិដ្ឋកម្ម ដោយបានអនុវត្តតាមការសន្យារបស់លោក ដែលបានធ្វើអំឡុងពេលមានសុន្ទរកថាយ៉ាងកាចមុះមុតថា នឹងមិនទុកជីវិតឲ្យពួកឈ្មួញគ្រឿងញៀនរាប់ពាន់នាក់នោះឡើយ។

នៅចន្ទ (ទី១០ ខែមីនា) នេះ ការិយាល័យរបស់ប្រធានាធិបតីបច្ចុប្បន្ន លោក Ferdinand Marcos Jr បានប្រាប់ឲ្យដឹងថា គ្មានទំនាក់ទំនងផ្លូវការណាមួយ ត្រូវបានទទួលពីនគរបាលអាំងទែប៉ូល (Interpol) នៅឡើយទេ ប៉ុន្តែបានលើកឡើងថា លោក Duterte អាចត្រូវបានប្រគល់ឲ្យ។

អ្នកនាំពាក្យរបស់ប្រធានាធិបតី លោកស្រី Claire Castro បានប្រាប់អ្នកសារព័ត៌មានថា៖ «អ្នកអនុវត្តច្បាប់របស់យើង បានត្រៀមរួចជាស្រេច ដើម្បីអនុវត្តតាមអ្វីដែលច្បាប់កំណត់ ប្រសិនបើដីកាចាប់ខ្លួនត្រូវតែចេញ ដោយសារការស្នើសុំពីស្ថាប័នអាំងទែប៉ូល»។

ភ្លាមៗនេះ គេមិនទាន់ដឹងច្បាស់នៅឡើយទេថា តើលោក Duterte នឹងស្នាក់នៅក្នុងទីក្រុងហុងកុង ដែលគ្រប់គ្រងដោយប្រទេសចិន រយៈពេលយូរប៉ុន្មាននោះ ពោលគឺដែលមិនមែនជាភាគីរបស់ ICC។ លោក Duterte បាននៅក្នុងទីក្រុង ដើម្បីនិយាយនៅឯការជួបជុំយុទ្ធនាការមួយ ដែលមានការចូលរួមដោយកម្មករហ្វីលីពីនរាប់ពាន់នាក់ ដោយសង្ឃឹមថា នឹងជំរុញដល់ការគាំទ្រ សម្រាប់បេក្ខជនសមាជិកព្រឹទ្ធសភារបស់លោក នៅក្នុងការបោះឆ្នោតពាក់កណ្តាលអាណត្តិរបស់ហ្វីលីពីន នាពេលខាងមុខ។

ដោយបង្ហាញពីយុត្តិកម្មនៃយុទ្ធនាការប្រឆាំងគ្រឿងញៀនដ៏ឥតមេត្តារបស់លោក លោក Duterte បានប្រាប់អ្នកចូលរួមថា៖ «ឧបមាថា ពិតជាមានដីកានោះ ហេតុអ្វីបានជាខ្ញុំធ្វើវា (យុទ្ធនាការ)? ដើម្បីខ្លួនខ្ញុំឬ? ដើម្បីគ្រួសាររបស់ខ្ញុំឬ?។ ប្រសិនបើនេះជាជោគវាសនាអាក្រក់ នៅក្នុងជីវិតរបស់ខ្ញុំ ពិតប្រាកដមែននោះ មិនអីទេខ្ញុំនឹងទទួលយក។ ពួកគេអាចចាប់ខ្ញុំដាក់ពន្ធនាគារបាន។ តើអ្វីជាអំពើបាបរបស់ខ្ញុំ? ខ្ញុំបានធ្វើអ្វីគ្រប់យ៉ាង អំឡុងពេលកាន់តំណែង ដើម្បីសន្តិភាព និងជីវិតដ៏ស្ងប់សុខ សម្រាប់ប្រជាជនហ្វីលីពីន»៕