ក្រសួងការបរទេសចិន បានប្រាប់ឲ្យដឹងថា ប្រទេសចិននឹងបន្តលើកកម្ពស់ទំនាក់ទំនងទ្វេភាគីជាមួយកាណាដា ដោយផ្អែកលើមូលដ្ឋានគោរពគ្នាទៅវិញទៅមក និងសមភាព បន្ទាប់ពីលោក Mark Carney បានឈ្នះការប្រកួតប្រជែង ដើម្បីដឹកនាំគណបក្សកាន់អំណាចរបស់ប្រទេសកាណាដា និងក្លាយជានាយករដ្ឋមន្ត្រីបន្ទាប់។

គួរបញ្ជាក់ថា លោក Carney ជាធនាគារិករបស់ធនាគារកណ្ដាល ២សម័យកាល ដែលមិនធ្លាប់បានកាន់តំណែងជាប់ឆ្នោតសោះឡើយ បានឈ្នះការប្រកួតប្រជែងជាអ្នកដឹកនាំ ដោយទទួលបានសំឡេង ៨៦ភាគរយនៃសន្លឹកឆ្នោតទាំងអស់ កាលពីថ្ងៃអាទិត្យ (ទី៩ ខែមីនា) ហើយនឹងត្រូវជំនួសតំណែងលោក Justin Trudeau ដែលបានប្រកាសលាលែង កាលពីខែមករា។

អំឡុងពេលនិយាយនៅឯសន្និសីទសារព័ត៌មានប្រចាំថ្ងៃ នាថ្ងៃចន្ទ (ទី១០ ខែមីនា) នេះ អ្នកនាំពាក្យក្រសួងការបរទេសចិន លោកស្រី Mao Ning បានអបអរសាទរ ចំពោះជ័យជម្នះរបស់លោក Carney ខណៈដែលជំរុញឲ្យកាណាដាធ្វើការជាមួយប្រទេសចិន ដើម្បីលើកកម្ពស់ទំនាក់ទំនងឲ្យកាន់តែប្រសើរ និងរីកចម្រើនឡើង។

លោកស្រី Mao បានប្រាប់ថា៖ «យើងរំពឹងថា ប្រទេសកាណាដានឹងប្រកាន់ខ្ជាប់នូវគោលបំណង និងការយល់ដឹងដ៏សមហេតុផល អំពីប្រទេសចិន ហើយបន្តគោលនយោបាយវិជ្ជមាន និងជាក់ស្តែង ចំពោះប្រទេសចិន»។

ជ័យជម្នះរបស់លោក Carney បានកើតមានឡើងមួយថ្ងៃបន្ទាប់ពីទីក្រុងប៉េកាំង បានប្រកាសដំឡើងពន្ធលើផលិតផលកសិកម្ម និងអាហាររបស់កាណាដា ដែលមានតម្លៃជាង ២,៦ពាន់លានដុល្លារ កាលពីថ្ងៃទី៨ ខែមីនា ជាការសងសឹកប្រឆាំងនឹងការយកពន្ធដែលទីក្រុង Ottawa បានដាក់ចេញកាលពីខែតុលា ឆ្នាំ២០២៤៕