នៅពេលត្រូវបានសួរ នៅថ្ងៃចន្ទ (ទី១០ ខែមីនា) នេះថា តើប្រទេសរុស្ស៊ីបានធ្វើការពិគ្រោះយោបល់ជាមួយអ៊ីរ៉ង់មុន ឬក្រោយទីក្រុងតេអេរ៉ង់ បានឆ្លើយតបទៅនឹងលិខិតរបស់ប្រធានាធិបតីអាមេរិក លោក Donald Trump ដែលជំរុញឲ្យប្រទេសនេះចរចាកិច្ចព្រមព្រៀងនុយក្លេអ៊ែរដែរ ឬទេ វិមានក្រឹមឡាំង បានបរ្រាប់ថា អ៊ីរ៉ង់បង្កើតគោលជំហរគោលនយោបាយផ្ទាល់ខ្លួន។

កាលពីថ្ងៃសៅរ៍ចុងសប្ដាហ៍កន្លងមក មេដឹកនាំជាន់ខ្ពស់របស់អ៊ីរ៉ង់ លោក Ayatollah Ali Khamenei បានលើកឡើងថា ទីក្រុងតេអេរ៉ង់ នឹងមិនត្រូវបានបង្ខំឲ្យចរចានោះទេ ពោលគឺមួយថ្ងៃបន្ទាប់ពីលោក Trump បាននិយាយថា លោកបានផ្ញើលិខិតមួយជំរុញឲ្យអ៊ីរ៉ង់ចូលរួមក្នុងកិច្ចចរចា ស្ដីពីកិច្ចព្រមព្រៀងនុយក្លេអ៊ែរថ្មី។

ហើយនៅពេលត្រូវបានសួរថា តើទីក្រុងមូស្គូបានពិគ្រោះជាមួយទីក្រុងតេអេរ៉ង់មុន ឬក្រោយមានលិខិតរបស់លោក Trump ដែរ ឬទេ អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា៖ «ទេ អ៊ីរ៉ង់ គឺជាប្រទេសដែលមានអធិបតេយ្យភាព ហើយបង្កើតគោលជំហររបស់ខ្លួន ដោយឯករាជ្យ ជុំវិញបញ្ហាគោលនយោបាយការបរទេសសំខាន់ៗ។ តែវាគឺច្បាស់ណាស់ថា ការប្រាស្រ័យទាក់ទងគ្នាដ៏តានតឹងខ្លាំង កំពុងរង់ចាំនៅខាងមុខ»។

លោក Trump ធ្លាប់បាននិយាយកាលពីមុនថា លោកនឹងចេញជាថ្មីម្ដងទៀតនូវគោលនយោបាយនៃ «ដាក់សម្ពាធអតិបរមា» លើអ៊ីរ៉ង់ ក្នុងគោលបំណងរារាំងប្រទេសនេះកុំផលិតបានអាវុធនុយក្លេអ៊ែរ បើទោះបីជាលោក បានបង្ហាញពីការបើកចំហ ចំពោះកិច្ចព្រមព្រៀងនុយក្លេអ៊ែរថ្មីជាមួយទីក្រុងតេអេរ៉ង់ក៏ដោយ៕