​ចិន៖ ប្រទេស​ចិន​បាន​លើក​ឡើង​ថា សហរដ្ឋអាមេរិក​បាន​ធ្វើ "​កំហុស​" ក្នុងការ​អញ្ជើញ​កោះ​តៃវ៉ាន់​ឲ្យ​ចូលរួម​ក្នុង​កិច្ចប្រជុំ​កំពូល​ប្រជាធិបតេយ្យ ​នាពេលខាងមុខ​របស់លោក Biden។​ ​ក្នុង​អំឡុង​កិច្ចប្រជុំ​តាម​វីដេអូរវាងប្រធានាធិបតី​ចិន និង​អាមេរិកកាលពី​ថ្ងៃទី​១៦ វិច្ឆិកា លោក Xi Jinping បាន​ព្រមាន​ថា លោក Biden «​កំពុងតែ​ប្រឡែង​លេង​ជាមួយ​ភ្លើង​» នៅ​ពេល​ដែល​និយាយ​ដល់​បញ្ហា​កោះ​តៃវ៉ាន់​។

​ភាព​តានតឹង​ជុំវិញ​កោះ​តៃវ៉ាន់​បានរួម​ចំណែក​ ដល់​ការ​រង្គោះរង្គើ​ដ៏​ធំ​រវាង​ទំនាក់ទំនងអាមេរិក និង​ចិន​។​ ​រដ្ឋាភិបាល​ចិន​បាន​ប្រា​ប់លោកប្រធានាធិបតី Joe Biden ថា​ ការអញ្ជើញ​កោះ​តៃវ៉ាន់​ឱ្យ​ចូលរួម​កិច្ចប្រជុំ​កំពូល​លទ្ធិប្រជាធិបតេយ្យ​ នាពេលខាងមុខ​គឺជា "​កំហុស​"។ ​យោងតាម​សារព័ត៌មាន​ The Guardian បានឱ្យដឹងថា​ លោក Zhu Fenglian អ្នកនាំពាក្យ​ការិយាល័យ​កិច្ចការ​តៃវ៉ាន់​របស់​ប្រទេស​ចិន​បាន​និយាយកាលពី​ថ្ងៃ​ពុធ​ថា ប្រទេស​ចិន​ប្រឆាំង​នឹងអន្តរ​កម្ម​ផ្លូវការ​ណាមួយ​រវាង​សហរដ្ឋអាមេរិក និង​តំបន់​តៃវ៉ាន់​របស់​ចិន​។ ​ក្រសួងការបរទេស​ចិនបាន​និយាយថា ខ្លួនប្រឆាំង​ដាច់ខាតចំពោះ​ការចូលរួម​របស់​កោះ​តៃវ៉ាន់​នៅក្នុង​កិច្ចប្រជុំ​កំពូល ដែល​នឹង​ធ្វើឡើង​តាម​វីដេអូ​នៅ​ថ្ងៃទី​៩ ​ដល់ថ្ងៃទី​១០ ខែ​ធ្នូ​ខាងមុខ​។

​លោក Zhao Lijian អ្នកនាំពាក្យ​ក្រសួងការបរទេស​បាន​ប្រាប់​អ្នកយកព័ត៌មាន​ថា "​សកម្មភាព​របស់​សហ​រដ្ឋ​អាមេរិក​ក្នុង​ការបង្ហាញ​លទ្ធិប្រជាធិបតេយ្យគ្រាន់តែ​ជាការ​បិទបាំង និង​ជា​ឧបករណ៍​សម្រាប់​ដើម្បី​ជំរុញ​គោលបំណង​ភូមិសាស្ត្រ​នយោបាយ​របស់ខ្លួន គាបសង្កត់ប្រទេស​ផ្សេងទៀត បែងចែក​ពិភពលោក និង​បម្រើ​ផលប្រយោជន៍​របស់ខ្លួន​ប៉ុណ្ណោះ​។ ​បញ្ជី​ឈ្មោះ​ប្រទេស​ចូលរួម​ក្នុង​កិច្ចប្រជុំ​កំពូល​នេះត្រូវបាន​ផ្សព្វផ្សាយ​កាលពី​ថ្ងៃ​អង្គារ ដែល​បង្ហាញថា​ កោះ​តៃវ៉ាន់​ស្ថិត​ក្នុងចំណោម​មេដឹកនាំ​ចំនួន ១១០រូបដែល​សហរដ្ឋអាមេរិក​បានអញ្ជើញ៕

អត្ថបទ៖ សុខមាន