​បាល់ទាត់៖ ​ក្រុម​ហង្ស​ក្រហម Liverpool ថ្វីបើ​មាន​កៅអី​នៅ​វគ្គ​បន្ត​ក្តី​នៅតែ​យកឈ្នះ​ក្រុម​ភ្ញៀវ​ព័រទុយហ្កាល់ FC Porto ២-០ បន្ត​ស្ថិតិ​ឈ្នះ ១០០% ក្នុង​ពូ​ល B​។ ​​ក្រុម​ម្ចាស់ផ្ទះ​ហាក់​ចាប់ផ្តើម​មិនបាន​ល្អ​ឡើយ​នៅ​វគ្គ​ទី១ ពោលគឺ​ក្រុម​ភ្ញៀវ Porto មានឱកាស​ពីរលើក​សំខាន់ៗ​តែ​ធ្វើមិនបាន​សំរេច​។​

​​យ៉ាង​ណា​ក្តី​ក្រុម​របស់លោក Jurgen Klopp ត្រូវ​រង់ចាំ​ដល់​នាទី​ទី៥២ ទើប​អាច​រកបាន​គ្រាប់​នាំមុខ​ដោយ Thiago Alcantara មុនពេលដែល Mohamed Salah ធានា​ជ័យជំនះ​នៅ​នាទី​ទី៧០​។ ​​ប្រកួត​នេះ Liverpool ក៏បាន​ទុក​កីឡាករ​សំខាន់ៗ​មួយចំនួន​ឱ្យ​សម្រាក​ផងដែរ​ដូចជា​ខ្សែការពារ Virjil van Dijk, Trent Alexander-Arnold និង Fabinho​។​ ​​ជ័យជំនះ​នេះ​ធ្វើឱ្យ Liverpool បន្ត​ឈ្នះ ៥ប្រកួត​ពេញ​ក្នុង​ពូ​ល B នេះ​ខណៈ Porto នៅសល់​ឱកាស​អ៊ុត​កៅអី​វគ្គ ១៦ក្រុម​​នៅ​ប្រកួត​ចុងក្រោយ​ក្នុង​ពូ​ល​។

​​កៅអី​លេខ ២ ក្នុង​ពូ​ល​បាន​បើកចំហបន្ទាប់ពី AC Milan យកឈ្នះ​នៅ​ទឹកដី Atletico Madrid ១-០ ចុង​ម៉ោង​ដោយ Junior Messias មានន័យថា AC Milan ឡើងមក​លេខ ៣ មាន ៤ពិន្ទុ​ស្មើ​ជាមួយ Atletico Madrid ដែល​នៅក្រោម​គេ​ខណៈ Porto ឈរ​លេខ ២ មាន ៥ពិន្ទុ​។ ​ប្រកួត​ចុងក្រោយ​ក្នុង​ពូ​ល AC Milan ត្រូវ​ជួប Liverpool ខណៈ Porto ទទួល Atletico Madrid៕

​អត្ថបទ​៖​នាង សុភា​វុ​ធ