ក្រសួងការពារជាតិស៊ីរីនៅទីក្រុងដាម៉ាស់ រាយការណ៍ថា រដ្ឋាភិបាលស៊ីរីបានបញ្ចប់ប្រតិបត្តិការសន្តិសុខរបស់ខ្លួននៅតំបន់ភាគខាងលិចប្រទេស ដែលជាទឹកដៃរបស់ក្រុមភក្តីភាពចំពោះអតីតមេដឹកនាំស៊ីរីលោកBashar al-Assad ។

លោក Hassan Abdul Ghani គឺជាអ្នកនាំពាក្យក្រសួងការពារជាតិស៊ីរីបានធ្វើសេចក្តីប្រកាសនៅថ្ងៃចន្ទនេះ ដោយលោកបញ្ជាក់នៅក្នុងសេចក្តីថ្លែងការណ៍តាមបណ្តាញព័ត៌មានសង្គមXថា ក្រុមគំរាមកំហែងសន្តិសុខត្រូវបានសម្លាប់អស់នៅខេត្ត Latakia និងខេត្ត Tartous ។

សេចក្តីរាយការណ៍បានឲ្យដឹងថា មនុស្សរាប់ពាន់នាក់ រួមទាំងជនស៊ីវិល ត្រូវបានសម្លាប់នៅក្នុងរយៈពេលប៉ុន្មានថ្ងៃនៃអំពើហិង្សាស្លាប់មនុស្សដែលជំរុញឲ្យមានការព្រួយបារម្ភពីអន្តរជាតិ។

លោក Ghani និយាយថាដោយសម្រេចបានការកម្ទេចក្រុមគំរាមកំហែងសន្តិសុខ ពួកយើងសូមធ្វើការប្រកាសបញ្ចប់ប្រតិបត្តិការយោធា។ ពួកយើងអាចសម្លាប់ចោលអស់ក្រុមសំណល់របស់របបដួលរលំ ហើយនិងក្រុមមន្រ្តីរបស់ពួកគេ ។

ក្រុមសង្កេតការសិទ្ធិមនុស្សស៊ីរី និយាយនៅថ្ងៃចន្ទនេះថា មនុស្សជិត១.៥០០នាក់ ត្រូវបានសម្លាប់នៅក្នុងអំពើហិង្សា ចាប់តាំងពីថ្ងៃព្រហស្បតិ៍សប្តាហ៍មុនរហូតមក៕