ក្រុមចរចារបស់អ៊ីស្រាអែល ទៅកាតាកាលពីថ្ងៃចន្ទ ១០ មីនា សម្រាប់កិច្ចពិភាក្សាក្នុងគោលបំណងបន្តផ្អាកបទឈប់បាញ់នៅតំបន់ហ្កាហ្សាដ៏ផុយស្រួយ បន្ទាប់ពីអាជ្ញាធរបានកាត់បន្ថយការផ្គត់ផ្គង់អគ្គិសនីរបស់ទឹកដីប៉ាឡេស្ទីន និងបិទការនាំចូលជំនួយ ដើម្បីបង្កើនសម្ពាធលើក្រុមហាម៉ាស។

នៅមុនការចរចា អ៊ីស្រាអែល បានផ្តាច់ខ្សែថាមពលតែមួយគត់ទៅកាន់រោងចក្រចម្រោះទឹកនៅហ្កាហ្សា ជាទង្វើដែលក្រុមហាម៉ាសរិះគន់ថាជា ចំណាត់ការផ្ដេសផ្ដាស់ និងមិនអាចទទួលយកបាន។

ដំណាក់កាលដំបូងនៃកិច្ចព្រមព្រៀងបទឈប់បាញ់បានផុតកំណត់កាលពីថ្ងៃទី ១ ខែមីនា ដោយមិនមានកិច្ចព្រមព្រៀងលើដំណាក់កាលបន្តបន្ទាប់ ដែលគួរតែធានាបាននូវការបញ្ចប់ដ៏យូរអង្វែងនៃសង្រ្គាមដែលបានផ្ទុះឡើងដោយការវាយប្រហារកាលពីថ្ងៃទី ៧ ខែតុលា ឆ្នាំ២០២៣ ពីសំណាក់ក្រុមហាម៉ាសលើអ៊ីស្រាអែលសម្លាប់មនុស្សជាង១.០០០នាក់។មានការខ្វែងគំនិតគ្នាអំពីរបៀបបន្តបទឈប់បាញ់។ក្រុមហាម៉ាសចង់បានការចរចាភ្លាមៗនៅដំណាក់កាលបន្ទាប់ ប៉ុន្តែអ៊ីស្រាអែលចង់បន្តដំណាក់កាលទីមួយ។

ក្រុមហាម៉ាស បានចោទប្រកាន់អ៊ីស្រាអែលពីបទបដិសេធលើកិច្ចព្រមព្រៀងបទឈប់បាញ់ដោយនិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថាអ៊ីស្រាអែល "បដិសេធមិនចាប់ផ្តើមដំណាក់កាលទីពីរដោយបង្ហាញពីចេតនារបស់ខ្លួនក្នុងការគេចវេសនិងធ្វើឲ្យជាប់គាំង" ។

មន្ត្រីអ៊ីស្រាអែលមួយរូប បានប្រាប់សារព័ត៌មាន AFP ថា ក្រុមការងារចរចារបស់ប្រទេសនេះ បានចាកចេញទៅក្រុងដូហា។ របាយការណ៍ប្រព័ន្ធផ្សព្វផ្សាយបាននិយាយថា គណៈប្រតិភូត្រូវបានដឹកនាំដោយមន្ត្រីជាន់ខ្ពស់មួយរូបមកពីទីភ្នាក់ងារសន្តិសុខក្នុងស្រុក Shin Bet។ភាពតានតឹងកើនឡើងជាថ្មី ខណៈអ៊ីស្រាអែលជំរុញក្រុមហាម៉ាសទទួលយកការបន្តបទឈប់បាញ់ដំណាក់កាលទី១ ។ក្រុមនេះចង់ចាប់ផ្ដើមការចរចាភ្លាមៗលើដំណាក់កាលទី២នៃបទឈប់បាញ់ ដែលនឹងមើលឃើញការដោះលែងចំណាប់ខ្មាំងនៅសេសសល់ និងការដកកងទ័ពអ៊ីស្រាអែល ចេញពីដែនដីហ្កាហ្សា៕