អតីតមន្រ្តីធនាគារកណ្តាល លោក Mark Carney ដែលទើបតែទទួលបានជ័យជម្នះយ៉ាងលើសលប់ដើម្បីក្លាយជាមេដឹកនាំគណបក្សសេរីនិយម កំពុងកាន់អំណាចរបស់ប្រទេសកាណាដា ហើយនិងក្លាយជានាយករដ្ឋមន្ត្រីបន្ទាប់របស់ប្រទេសនេះ បានជួបជាមួយលោក Justin Trudeau កាលពីថ្ងៃចន្ទ (១០ មីនា) ហើយបានសន្យាថា ការផ្ទេរអំណាចជាផ្លូវការនឹងកើតមានយ៉ាងឆាប់រហ័ស។

សមាជិកបក្សសេរីនិយមកាលពីថ្ងៃអាទិត្យ បានជ្រើសរើសលោក Carney ថាជាបេក្ខភាពល្អបំផុតដើម្បីទប់ទល់នឹងប្រធានាធិបតីសហរដ្ឋអាមេរិក លោក Donald Trump ដែលបានគំរាមកំហែងដាក់បញ្ចូលកាណាដាជារដ្ឋទី៥១ របស់អាមេរិក ក៏ដូចជាបានចាប់ផ្តើមសង្រ្គាមពាណិជ្ជកម្ម និងការដាក់ទណ្ឌកម្មពន្ធលើសម្ព័ន្ធមិត្តយូរអង្វែងមួយនេះ។

គួរបញ្ជាក់ថា លោក Trudeau នៅតែបន្តធ្វើជានាយករដ្ឋមន្ត្រីរហូតដល់លោក Carney ចូលកាន់តំណែងជាផ្លូវការ។ លោក Carney បាននិយាយបន្ទាប់ពីជួបជាមួយលោក Trudeau ថា "ការផ្ទេរអំណាចនោះនឹងមានភាពរលូន ហើយនឹងលឿន"។ កាសែត Globe and Mail រាយការណ៍ថា លោក Carney ទំនងជាត្រូវបានតែងតាំងជាផ្លូវការនៅថ្ងៃព្រហស្បតិ៍ ឬថ្ងៃសុក្រ សប្ដាហ៍នេះ។

នៅពេលត្រូវសាកសួរពីទំនាក់ទំនងរបស់ខ្លួនជាមួយប្រធានាធិបតីអាមេរិក លោក Carney បានបដិសេធមិនឆ្លើយតប ដោយហេតុផលថាលោកមិនទាន់ជានាយករដ្ឋមន្ត្រី។ សារព័ត៌មាន Politico បាននិយាយមុននោះថា មេដឹកនាំទាំងពីររូបអាចនឹងពិភាក្សាគ្នាលឿនបំផុតនៅព្រឹកថ្ងៃចន្ទសប្ដាហ៍ក្រោយ៕