នាយករដ្ឋមន្ត្រីថ្មីរបស់ប្រទេសកាណាដាលោក Mark Carney បានរិះគន់លោកប្រធានាធិបតីអាមេរិក Donald Trump ចំពោះការដំឡើងពន្ធមិនសមហេតុផល ដោយនិយាយថា សហរដ្ឋអាមេរិកមិនគួរសាងកំហុសទេ ព្រោះកាណាដា នឹងឈ្នះសង្គ្រាមពាណិជ្ជកម្ម ដូចដែលខ្លួនឈ្នះលើប្រភេទកីឡា ហុកគី អញ្ចឹង។

លោក Carney ដែលបានឈ្នះការបោះឆ្នោតជាមេដឹកនាំគណបក្សសេរីនិយម កំពុងកាន់អំណាចដើម្បីស្នងតំណែងបន្តពីលោក Justin Trudeau ជានាយករដ្ឋមន្ត្រី នៅក្នុងសុន្ទរកថាជ័យជម្នះរបស់លោក ក៏បានរិះគន់ប្រធានាធិបតីអាមេរិកផងដែរ ចំពោះការលើកឡើងថា កាណាដា គួរតែចូលរួមជាមួយសហរដ្ឋអាមេរិកជារដ្ឋទី៥១ របស់ខ្លួន។

លោក Carney វ័យ៥៩ ឆ្នាំ បាននិយាយថា សហរដ្ឋអាមេរិក មិនមែនជាប្រទេសកាណាដាទេ។ ហើយកាណាដា ក៏មិនដែលនឹងក្លាយជាផ្នែកមួយរបស់អាមេរិកក្នុងទម្រង់ណាមួយ ឬវិធីណាមួយដែរ។

ពួកលោកពុំបានស្នើសុំឱ្យមានការតតាំងគ្នានោះទេ ប៉ុន្តែប្រជាជនកាណាដា តែងតែត្រៀមខ្លួននៅពេលដែលនរណាម្នាក់បង្កហេតុមុន។

អតីតទេសាភិបាលធនាគាររូបនេះ បានប្ដេជ្ញាតតាំងជាមួយលោក Donald Trump និង បានជំរុញប្រទេសរបស់លោកឲ្យរួបរួមគ្នាអំឡុងមានជម្លោះពាណិជ្ជកម្មដ៏ធ្ងន់ធ្ងរជាមួយសហរដ្ឋអាមេរិក៕