រដ្ឋមន្ត្រីការបរទេសសហរដ្ឋអាមេរិក លោក Marco Rubio បាននិយាយថា រដ្ឋបាលរបស់លោក Trump បានបិទកម្មវិធីជាង៨០ភាគរយនិងកិច្ចសន្យាចំនួន៥.២០០ នៅទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ(USIAD) ខណៈក្រសួងរបស់លោក បានបញ្ចប់ការពិនិត្យឡើងវិញរបស់ខ្លួន លើទីភ្នាក់ងារដែលត្រូវបានចោទប្រកាន់ពីបទចែកចាយជំនួយទៅក្រៅប្រទេស។

លោក Rubio បាននិយាយនៅក្នុងការបង្ហោះនៅលើគណនីផ្ទាល់ខ្លួនរបស់លោកលើបណ្តាញ X កាលពីថ្ងៃចន្ទថា ការលុបចោលនេះគឺផ្លូវការ បន្ទាប់ពីការពិនិត្យឡើងវិញរយៈពេល៦សប្តាហ៍របស់ក្រសួងការបរទេស។ ពួកគេបានបង្ហាញកិច្ចសន្យាដែល «បានចំណាយប្រាក់រាប់ពាន់លានដុល្លារក្នុងវិធីជាច្រើន ដែលមិនបម្រើផលប្រយោជន៍ជាតិស្នូលរបស់សហរដ្ឋអាមេរិក។

ប្រធានាធិបតីសហរដ្ឋអាមេរិក លោក Donald Trump មកពីគណបក្សសាធារណរដ្ឋ បានបញ្ជាឱ្យផ្អាករយៈពេល៩០ថ្ងៃលើការចំណាយដល់ជំនួយបរទេសទាំងអស់នៅថ្ងៃដំបូងដែលលោកចូលកាន់តំណែង។ ក្រុមជំនួយ បានរាយការណ៍ពីភាពវឹកវរ និងការយល់ច្រឡំ។ បុគ្គលិករាប់ពាន់នាក់ ត្រូវបានឱ្យឈប់សម្រាកពីការងារ ឬត្រូវបានបណ្តេញចេញ។

លោក Trump បានប្រគល់ភារកិច្ចទៅឱ្យទីប្រឹក្សាលោក Musk ដោយការរំលាយចោលទីភ្នាក់ងារ USAID ជាផ្នែកមួយនៃការជំរុញដើម្បីកាត់បន្ថយរដ្ឋាភិបាលសហព័ន្ធ។

ទន្ទឹមនឹងនេះ អង្គការជំនួយបរទេសរបស់សហរដ្ឋអាមេរិក បានប្តឹងរដ្ឋបាលរបស់លោក Trump ជុំវិញការបង្កកមូលនិធិរបស់ខ្លួន និងបាននិយាយថាពួកគេត្រូវបានគេជំពាក់ប្រាក់ច្រើនជាង៦៧១លានដុល្លារ សម្រាប់ការងារកន្លងមក។ តុលាការសហព័ន្ធ បានបង្គាប់ឱ្យបង់ប្រាក់តាមកាលកំណត់កាលពីថ្ងៃច័ន្ទ។