ប្រជាជននៅប្រទេសស៊ីរី បានប្រមូលផ្តុំគ្នានៅទីក្រុងហ្គាមីសលី ភាគឦសានប្រទេសស៊ីរី និងរដ្ឋធានី ដាម៉ាស នៅថ្ងៃអង្គារ ទី១១ មីនា នេះ ដោយអបអរកិច្ចព្រមព្រៀងដែលបានចុះហត្ថលេខាដោយប្រធានាធិបតីបណ្តោះអាសន្ន លោក Ahmed Al-Sharaa ជាមួយមេបញ្ជាការកងកម្លាំងប្រជាធិបតេយ្យស៊ីរី (SDF) លោក Mazloum Abdi ។

រថយន្តជាច្រើនគ្រឿង ពេញទៅដោយមនុស្សអបអរសប្បាយរីករាយ ធ្វើដំណើរតាមដងផ្លូវនៅទីក្រុង ហ្គាមីសលី និងទីក្រុងដាម៉ាស នៅព្រឹកថ្ងៃអង្គារនេះ ដោយពួកគេបានស្រែកថា «មួយ មួយ មួយ ប្រជាជនស៊ីរី គឺតែមួយ»។

កងកម្លាំងប្រជាធិបតេយ្យស៊ីរី (SDF) ដឹកនាំដោយជនជាតិឃឺដ និងគាំទ្រដោយសហរដ្ឋអាមេរិក បានគ្រប់គ្រងភាគច្រើននៅភាគឦសានដែលសម្បូរដោយប្រេងរបស់ប្រទេសស៊ីរី បានចុះហត្ថលេខាលើកិច្ចព្រមព្រៀងជាមួយរដ្ឋាភិបាលក្រុងដាម៉ាស កាលពីថ្ងៃចន្ទ ទី១០ មីនា ដើម្បីចូលរួមក្នុងស្ថាប័នរដ្ឋថ្មីរបស់ប្រទេសស៊ីរី។

កិច្ចព្រមព្រៀងនេះ បានធ្វើឡើងនៅគ្រាដ៏សំខាន់មួយ ខណៈលោក Sharaa រកវិធីដោះស្រាយការសម្លាប់រង្គាលលើសមាជិកជនជាតិភាគតិចនីកាយអាឡាវីត(Alawite) នៅភាគខាងលិចប្រទេសស៊ីរី ជាអំពើហិង្សាដែលលោកបាននិយាយកាលពីថ្ងៃចន្ទថា បានគំរាមកំហែងដល់កិច្ចខិតខំប្រឹងប្រែងរបស់លោក ក្នុងការបង្រួបបង្រួមប្រទេសស៊ីរី ក្រោយជម្លោះរយៈពេល១៤ ឆ្នាំ។