នៅពេលដែលលោកប្រធានាធិបតីអាមេរិក Donald Trump បានចាប់ផ្ដើមសង្រ្គាមពន្ធថ្មី ប្រទេសចិន មិនបានភ័យព្រួយបន្តិចសោះឡើយ ខណៈក្រុមអ្នកវិភាគព្រមានថា ទីក្រុងវ៉ាស៊ីនតោននឹងប៉ះគូប្រជែងដែលកាន់តែខ្លាំងក្លា និងត្រៀមខ្លួនបានល្អជាងមុននៅទីក្រងប៉េកាំង មិនដូចអាណត្តិទីមួយរបស់លោក Trump ក្នុងភាពតានតឹងពាណិជ្ជកម្មឆ្នាំ២០១៨ នោះទេ។

ចាប់តាំងពីការវិលត្រឡប់មកសេតវិមានវិញក្នុងខែមករា លោក Trump បានដំឡើងពន្ធសរុប ២០% លើការនាំចូលរបស់ចិនរួចទៅហើយ ដោយចោទទីក្រុងប៉េកាំង ថាមិនបានទប់ស្កាត់ការនាំចេញសារធាតុញៀនហ្វង់តានីល ទៅអាមេរិក។ ពន្ធថ្មីនេះបានបន្ថែមពីលើពន្ធមុនៗដែលដាក់រួចទៅហើយដោយលោក Trump និងអតីតប្រធានាធិបតីអាមេរិក Joe Biden លើទំនិញចិន តម្លៃជាង ៤០០ពាន់លានដុល្លារ។

បន្ទាប់ពីថ្កោលទោសពន្ធចុងក្រោយបង្អស់របស់អាមេរិកថាជា "ការគំរាមកំហែង" និង "ការបំភិតបំភ័យ" ទីក្រុងប៉េកាំង បានវាយបកវិញកាលពីសប្តាហ៍មុន ដោយការប្រកាសពន្ធសងសឹកពី ១០% ទៅ ១៥% លើទំនិញកសិកម្មជាច្រើនរបស់អាមេរិក រួមមានពោត សាច់គោ សាច់ជ្រូក ផលិតផលទឹកដោះគោ និងសណ្តែកសៀងជាដើម ដែលបង្ហាញពីការត្រៀមខ្លួនរួចជាស្រេចបានយ៉ាងល្អ។

លោក Christopher Beddor អនុប្រធានផ្នែកស្រាវជ្រាវរបស់ចិន មូលដ្ឋាននៅទីក្រុងប៉េកាំង បាននិយាយថា ជម្លោះពន្ធចុងក្រោយបំផុតនេះ គួរតែ "អាចគ្រប់គ្រងបាន" សម្រាប់ប្រទេសចិន ខណៈអត្រានោះស្ថិតនៅក្រោមតួលេខ ៦០% ដែលលោក Trump បានគំរាមកំហែងក្នុងអំឡុងពេលយុទ្ធនាការបោះឆ្នោតរបស់ខ្លួន៕