ក្រុមអ្នកការទូតបាននិយាយកាលពីថ្ងៃចន្ទ (១០ មីនា) ថា ក្រុមប្រឹក្សាសន្តិសុខរបស់អង្គការសហប្រជាជាតិ នឹងធ្វើកិច្ចប្រជុំបិទទ្វារយ៉ាងសំខាន់មួយនៅថ្ងៃពុធ (១២ មីនា) ស្អែកនេះ ជុំវិញការពង្រីកឃ្លាំងស្តុកសារធាតុអ៊ុយរ៉ានីនីញ៉ូមដែលខិតនៅជិតកម្រិតអាវុធនុយក្លេអ៊ែររបស់អ៊ីរ៉ង់។

កិច្ចប្រជុំនេះ ត្រូវបានស្នើដោយសមាជិកចំនួន៦ ក្នុងចំណោមសមាជិកក្រុមប្រឹក្សាចំនួន១៥ រួមមានបារាំង ក្រិក ប៉ាណាម៉ា កូរ៉េខាងត្បូង អង់គ្លេស និងសហរដ្ឋអាមេរិក។

អ្នកការទូតនិយាយថា ពួកគេក៏ចង់ឱ្យក្រុមប្រឹក្សា ពិភាក្សាគ្នាអំពីកាតព្វកិច្ចរបស់អ៊ីរ៉ង់ ក្នុងការផ្តល់ឱ្យអង្គការឃ្លាំមើលនុយក្លេអ៊ែររបស់អង្គការសហប្រជាជាតិ គឺទីភ្នាក់ងារអាតូមិកអន្តរជាតិ IAEA នូវ "ព័ត៌មានចាំបាច់ដើម្បីបញ្ជាក់អំពីបញ្ហាលេចធ្លោទាក់ទងនឹងសម្ភារៈនុយក្លេអ៊ែរមិនបានប្រកាស ដែលបានរកឃើញនៅទីតាំងជាច្រើនក្នុងប្រទេសអ៊ីរ៉ង់"។

អ៊ីរ៉ង់ បដិសេធថាខ្លួនមិនចង់អភិវឌ្ឍអាវុធនុយក្លេអ៊ែរទេ តែទោះជាយ៉ាងនេះក្ដី IAEA ព្រមានថា នេះគឺជាការបង្កើនល្បឿនដ៏គ្រោះថ្នាក់នៃសារធាតុអ៊ុយរ៉ានីញ៉ូម ដល់កម្រិតភាពសុទ្ធរហូតដល់ ៦០% ដែលជិតដល់កម្រិតអាវុធប្រហែល ៩០%។ រដ្ឋលោកខាងលិចនិយាយថា កម្មវិធីស៊ីវិលណាមួយគឺមិនចាំបាច់ចម្រាញ់សារធាតុអ៊ុយរ៉ានីញ៉ូមដល់កម្រិតខ្ពស់បែបនេះ ហើយថា ពុំមានប្រទេសណាដែលធ្វើដូច្នេះដោយមិនផលិតគ្រាប់បែកនុយក្លេអ៊ែរឡើយ ប៉ុន្តែអ៊ីរ៉ង់និយាយថា ខ្លួនកំពុងធ្វើកម្មវិធីនុយក្លេអ៊ែរសន្តិភាពប៉ុណ្ណោះ៕