នៅពេលដែលអឺរ៉ុបកំពុងព្យាយាមបង្កើនវិធានការការពាររបស់ខ្លួនឡើងវិញ នៅចំពោះមុខសង្គ្រាមរបស់រុស្ស៊ី ដែលកើតមានក្នុងដែនដីរបស់ខ្លួន និងការដកខ្លួនជាក់ស្តែងរបស់សហរដ្ឋអាមេរិក សំឡេងប្រឆាំងមួយចំនួន កំពុងបន្លឺឡើងមិនយល់ស្របនឹងការបំពាក់អាវុធបន្ថែមទៀតរបស់ទ្វីបនេះ។

អំឡុងពេលទៅទស្សនកិច្ច នៅទីក្រុងប្រ៊ុចសែល ប្រទេសបែលហ្ស៊ិក លោក Yanis Varoufakis បដិសេធមិនបន្ធូរបន្ថយការនិយាយពាក្យត្រង់ៗរបស់លោកជាថ្មីម្តងទៀត ដោយសហស្ថាបនិកនៃចលនាឆ្វេងនិយមទូទាំងអឺរ៉ុប DiEM25 បានលើកឡើងនៅក្នុងបទសម្ភាសន៍ជាមួយសារព័ត៌មាន Euronews ថា «ការរៀបចំបំពាក់អាវុធឡើងវិញ របស់អឺរ៉ុប គឺជាកំហុសឆ្គងដ៏ធំបន្ទាប់របស់សហភាពអឺរ៉ុប (EU)»។

លោក Varoufakis បានបន្ថែមថា៖ «វានឹងធ្វើឲ្យយើងមិនសូវមានសុវត្ថិភាព។ វានឹងធ្វើឲ្យជីវិតរបស់ប្រជាជនកាន់តែអាក្រក់ ព្រៃផ្សៃ និងខ្លី នៅតំបន់អឺរ៉ុប»។

លោក Varoufakis ជឿថា ការពង្រីកកម្លាំងយោធារបស់អឺរ៉ុប នឹង «បំផ្លាញរចនាសម្ព័ន្ធសង្គម» ដោយមិនមានការធានាសន្តិសុខនោះឡើយ។ សេដ្ឋវិទូឆ្វេងនិយមរូបនេះ បានពន្យល់ថា «វាជាវិធីធ្វើឲ្យអឺរ៉ុបចុះខ្សោយ តាមរយៈវិធីសាស្ត្រធ្វើឲ្យប្លុកកាន់តែរឹងមាំ»។

គួរបញ្ជាក់ថា ដោយត្រូវប្រឈមនឹងការដកខ្លួនរបស់សហរដ្ឋអាមេរិក រដ្ឋជាសមាជិក EU ទាំង ២៧ប្រទេស កំពុងទទួលខុសត្រូវសន្តិសុខរបស់ពួកគេដោយខ្លួនឯងផ្ទាល់ ដោយផ្តល់ការអនុញ្ញាតដល់ផែនការបំពាក់អាវុធដល់អឺរ៉ុបឡើងវិញ ដែលរួមមានទាំងការប្រមូលថវិកាចំនួន ៨០០ពាន់លានអឺរ៉ូផងដែរ។ ជាមួយគ្នានេះ គណៈកម្មការអឺរ៉ុបក៏បានស្នើផងដែរថា រដ្ឋសមាជិកត្រូវលើកលែងច្បាប់ថវិកាបែបប្រពៃណីរបស់សហភាពអឺរ៉ុប ដើម្បីផ្តល់ហិរញ្ញប្បទានដល់ការចំណាយលើវិស័យការពារជាតិរបស់ពួកគេ៕