បុគ្គលដែលបានដឹងដោយផ្ទាល់ អំពីបញ្ហានេះ កាលពីថ្ងៃចន្ទ (ទី១០ ខែមីនា) បានប្រាប់ឲ្យដឹងថា ក្រុមហ៊ុន Apple និង Meta Platforms នឹងត្រូវប្រឈមជាមួយការផាកពិន័យតិចតួច ជុំវិញការចោទប្រកាន់ថា បានបំពានច្បាប់ដ៏សំខាន់ ដែលត្រូវបានបង្កើតឡើងក្នុងគោលបំណងគ្រប់គ្រងឥទ្ធិពលរបស់ក្រុមហ៊ុនទាំង២។

ក្រុមហ៊ុនទាំង២ បានស្ថិតនៅក្នុងគោលដៅស៊ើបអង្កេតរបស់គណៈកម្មការអឺរ៉ុប ចាប់តាំងពីឆ្នាំមុន ពាក់ព័ន្ធនឹងលទ្ធភាពនៃការរំលោភលើច្បាប់ទីផ្សារឌីជីថល (DMA) ដែលអាចធ្វើឲ្យក្រុមហ៊ុនខាតបង់រហូតដល់ ១០ភាគរយនៃការលក់ប្រចាំឆ្នាំជាសកលរបស់ពួកគេ។

ចំណាត់ការនេះ ដែលបានក្លាយជាច្បាប់នៅក្នុងខែឧសភា ឆ្នាំ២០២៣ ព្យាយាមធ្វើឲ្យមានភាពកាន់តែងាយស្រួលដល់អ្នកប្រើប្រាស់ ក្នុងការផ្លាស់ប្ដូរ រវាងសេវាកម្មអនឡាញនានាដែលកំពុងប្រកួតប្រជែងគ្នា ដូចជាសេវាបណ្ដាញសង្គម កម្មវិធីស្វែងរកតាមអ៊ីនធឺណិត និងអេបស្ត័រ ដែលអនុញ្ញាតឲ្យក្រុមហ៊ុនតូចៗប្រកួតប្រជែងជាមួយក្រុមហ៊ុនបច្ចេកវិទ្យាធំបាន។

ប្រភពបានបន្ថែមថា ស្ថាប័នអនុវត្តច្បាប់ប្រឆាំងទំនុកចិត្តរបស់សហភាពអឺរ៉ុប គឺផ្តោតលើការធ្វើឲ្យប្រាកដថា ក្រុមហ៊ុនទាំងនោះគោរពតាមច្បាប់ ជាជាងការដាក់ទណ្ឌកម្ម ចំពោះពួកគេ ដោយពន្យល់ពីហេតុផលសម្រាប់ការផាកពិន័យតិចតួចនេះ។

ហើយពួកគេបានបញ្ជាក់បន្ថែមថា ហេតុផលផ្សេងទៀត គឺការរំលោភរយៈពេលខ្លី ពោលគឺ DMA ទើបចូលជាធរមាននៅឆ្នាំ២០២៣ និងបរិយាកាសភូមិសាស្ត្រនយោបាយ៕