ចក្រភពអង់គ្លេសកាលពីថ្ងៃចន្ទ បានអំពាវនាវឲ្យអាជ្ញាធរបណ្តោះអាសន្ន ក្នុងសាធារណរដ្ឋអារ៉ាប់ស៊ីរី ចាត់វិធានការជាបន្ទាន់ ដើម្បីដោះស្រាយការកើនឡើងនៃអំពើហិង្សា នៅក្នុងប្រទេសនេះ រួមទាំងរបាយការណ៍អំពីជនរងគ្រោះស៊ីវិលសំខាន់ៗ នៅក្នុងតំបន់ឆ្នេរផងដែរ។

ថ្លែងនៅក្នុងសភា អនុរដ្ឋមន្ត្រីក្រសួងការបរទេសលោក Hamish Falconer បានពណ៌នាព្រឹត្តិការណ៍ថ្មីៗថា «គួរឲ្យព្រួយបារម្ភយ៉ាងខ្លាំង» ខណៈដែលលោកបានអះអាងជាថ្មីនូវការប្តេជ្ញាចិត្តរបស់ចក្រភពអង់គ្លេស ក្នុងការគាំទ្រការផ្លាស់ប្តូររបស់ប្រទេសស៊ីរី បន្ទាប់ពីលោក បាសា អាល់អាសាដ ( Bashar Assad) ត្រូវបានផ្តួលរលំ នៅក្នុងខែធ្នូ។

លោក Falconer បាននិយាយថា ចក្រភពអង់គ្លេស កំពុងធ្វើការ «ឲ្យបានលឿនតាមដែលអាចធ្វើទៅបាន» ដើម្បីផ្ទៀងផ្ទាត់របាយការណ៍នៃអំពើហិង្សាចុងក្រោយបង្អស់ និងកំណត់អត្តសញ្ញាណអ្នកដែលទទួលខុសត្រូវ។ លោកបានជំរុញឲ្យរដ្ឋាភិបាលបណ្តោះអាសន្ន នៅទីក្រុងដាម៉ាស ( Damascus) រក្សាការប្តេជ្ញាចិត្តរបស់ខ្លួន ដើម្បីការពារប្រជាជនស៊ីរីទាំងអស់ និងរៀបចំផែនការច្បាស់លាស់សម្រាប់យុត្តិធម៌អន្តរកាល។

លោក Falconer បានប្រាប់សមាជិកសភាថា៖«ពេលនេះ គឺជាពេលវេលាដ៏សំខាន់សម្រាប់ប្រទេសស៊ីរី» ។ «អាជ្ញាធរបណ្តោះអាសន្ន ត្រូវតែបង្ហាញពីចេតនារបស់ពួកគេ ក្នុងការលើកកម្ពស់ស្ថិរភាព និងគ្រប់គ្រងដើម្បីផលប្រយោជន៍របស់ប្រជាជនស៊ីរីទាំងអស់»។