នៅមណ្ឌលកុមារកំព្រា Nyumbani Children's Home ស្ថិតក្នុងរដ្ឋធានីណៃរ៉ូប៊ី ប្រទេសកេនយ៉ា ក្មេងៗផ្ទុកវីរុសហ៊ីវនាំគ្នាលោតលេងលើត្រាំប៉ូលីន(Trampoline) សើចយ៉ាងសប្បាយរីករាយ ដោយបិទបាំងក្តីបារម្ភកើនឡើងនៅក្នុងចំណោមបុគ្គលមណ្ឌលមួយនេះចំពោះអនាគតរបស់ពួកគេ ពេលដែលការកាត់ផ្តាច់ជំនួយសហរដ្ឋអាមេរិក ធ្វើឲ្យអាក់ខានដល់ការផ្គត់ផ្គង់ឱសថពន្យាជីវិតដ៏ចាំបាច់សម្រាប់ពួកគេ ។

ការបង្កកជំនួយបរទេសរយៈពេល ៩០ថ្ងៃ បញ្ជាឡើងដោយប្រធានាធិបតីសហរដ្ឋអាមេរិកលោក Donald Trump ក្រោយឡើងកាន់អំណាចកាលពីថ្ងៃទី ២០ ខែមករាកន្លងទៅ បានបញ្ឈប់ខ្សែសង្វាក់ផ្គត់ផ្គង់សកលសម្រាប់ផលិតផលវេជ្ជសាស្រ្តក្នុងការប្រយុទ្ធប្រឆាំងនឹងវីរុសហ៊ីវ និងជំងឺដទៃផ្សេងទៀត ប៉ុន្តែវារារាំងផងដែរ ការចែកចាយឱសថដែលធ្លាប់បានទៅដល់ប្រទេសគោលដៅរបស់វាអស់រយៈពេលជាយូរមកហើយ ។

អ្នកស្រី Tresa Palakudy គឺជាអ្នកគ្រប់គ្រងមណ្ឌលកុមារកំព្រា Nyumbani Children's Homeនិយាយថា បើសិនជាពួកគេបញ្ឈប់ថ្នាំប្រឆាំងមេរោគ ARV ដល់ពេលនោះ រឿងអាក្រក់បំផុតនឹងកើតឡើងនៅទីនេះ ។ ពួកយើងនឹងបាត់បង់ពួកគេម្នាក់ម្តងៗ ។

គ្លីនិកសុខភាពនៅជិតនោះ បានចែកចាយការផ្គត់ផ្គង់ថ្នាំប្រឆាំងមេរោគ ចាប់តាំងពីការបង្កកជំនួយ ធ្វើឲ្យអ្នកជំងឺហ៊ីវដូចជាអ្នកស្រី Alice Okwirry ទទួលបានការផ្គត់ផ្គង់ត្រឹមរយៈពេល ១ខែប៉ុណ្ណោះ ។

អ្នកស្រី Okwirry វ័យ ៥០ឆ្នាំ ដែលមានការព្រួយបារម្ភចំពោះអនាគត ចាប់តាំងពីអ្នកស្រីទទួលដំណឹងថាអាមេរិកកាត់ផ្តាច់ជំនួយនោះ និយាយថា បើសិនជា USAID បញ្ឈប់វា បញ្ឈប់ផ្តល់ហិរញ្ញវត្ថុដល់ពួកយើងសម្រាប់ថ្នាំប្រឆាំងវីរុសហ៊ីវទាំងនេះ តើអ្វីទៅដែលគាត់អាចធ្វើបាននោះ? កូនស្រី Chichi អាយុ ១៥ឆ្នាំរបស់គាត់ ក៏មានផ្ទុះវីរុសហ៊ីវផងដែរ ៕