នៅព្រឹកថ្ងៃអង្គារនេះ ប្រធានាធិបតីអ៊ុយក្រែនលោក Volodymyr Zelenskiy បានជួបពិភាក្សាការងារជាមួយរជ្ជទាយាទអារ៉ាប៊ីសាអ៊ូឌីតព្រះអង្គម្ចាស់ Mohammed bin Salman មុនកិច្ចប្រជុំរវាងក្រុមមន្រ្តីអ៊ុយក្រែន និងក្រុមមន្រ្តីសហរដ្ឋអាមេរិកដែលទីក្រុងវ៉ាស៊ីនតោនសង្ឃឹមថា នឹងផ្តល់នូវវឌ្ឍនភាពគួរឲ្យកត់សម្គាល់ ឆ្ពោះទៅរកការបញ្ចប់សង្រ្គាមរុស្ស៊ីជាមួយអ៊ុយក្រែន ។

 ទីភ្នាក់ងារសារព័ត៌មានរដ្ឋអារ៉ាប៊ីសាអ៊ូឌីត SPA រាយការណ៍ថា អំឡុងជំនួបនៅក្នុងទីក្រុង Jeddah រជ្ជទាយាទ Mohammed បានគូសបញ្ជាក់ពីការគាំទ្ររាជាណាចក្ររបស់ទ្រង់សម្រាប់កិច្ចខិតខំអន្តរជាតិ ដើម្បីដោះស្រាយវិបត្តិអ៊ុយក្រែន និងសម្រេចបានសន្តិភាព ។

 គួរឲ្យដឹងថា អារ៉ាប៊ីសាអ៊ូឌីត បានដើរតួជាអ្នកសម្របសម្រួល ចាប់តាំងពីការវាយលុករបស់រុស្ស៊ី រួមទាំងការរៀបចំឲ្យមានការដោះដូរឈ្លើយសឹក និងធ្វើជាម្ចាស់ផ្ទះកិច្ចប្រជុំកាលពីខែមុនរវាងទីក្រុងម៉ូស្គូ និងទីក្រុងវ៉ាស៊ីនតោន ។

 កិច្ចប្រជុំនៅថ្ងៃអង្គារនេះ រវាងក្រុមមន្រ្តីសហរដ្ឋអាមេរិក និងក្រុមមន្រ្តីអ៊ុយក្រែន គឺជាកិច្ចប្រជុំផ្លូវការលើកដំបូង ចាប់តាំងពីមានជម្លោះពាក្យសម្តីរបស់លោក Zelenskiy នៅឯសេតវិមាន ហើយប្រេសិតពិសេសរបស់លោក Trump ប្រចាំនៅតំបន់មជ្ឈិមបូព៌ាលោក Steve Witkoff និយាយថា លោកមានក្តីសង្ឃឹមខ្ពស់ ៕