លោកប្រធានាធិបតីអ៊ុយក្រែន Volodymyr Zelensky បាននិយាយកាលពីថ្ងៃអង្គារសប្ដាហ៍នេះថាអ៊ុយក្រែនបានទទួលយកបទឈប់បាញ់រយៈពេល ៣០ថ្ងៃដែលស្នើឡើងដោយសហរដ្ឋអាមេរិក បន្ទាប់ពីកិច្ចចរចាសន្តិភាពដ៏សំខាន់រវាងក្រមមន្ត្រីអាមេរិក និងអ៊ុយក្រែន នៅអារ៉ាប៊ីសាអ៊ូឌីត។

លោក Zelensky បាននិយាយបន្ទាប់ពីកិច្ចប្រជុំអស់រយៈពេលជាងប្រាំបីម៉ោងថា សំណើបទឈប់បាញ់ដែលទទួលយកដោយអ៊ុយក្រែនគ្របដណ្តប់លើសមរភូមិជួរមុខទាំងស្រុងនៃការប្រយុទ្ធជាមួយរុស្ស៊ី មិនមែនត្រឹមតែផ្លូវអាកាស និងសមុទ្រប៉ុណ្ណោះទេ។ 

លោក Zelensky បាននិយាយថា "អ៊ុយក្រែនទទួលយកសំណើនេះ យើងចាត់ទុកថាជាចំណុចវិជ្ជមាន យើងត្រៀមខ្លួនជាស្រេចដើម្បីចាត់វិធានការបែបនេះ ហើយសហរដ្ឋអាមេរិកត្រូវតែបញ្ចុះបញ្ចូលរុស្ស៊ីឱ្យយល់ព្រមដែរ" ដោយបន្ថែមថាបទឈប់បាញ់នឹងចាប់ផ្តើមនៅពេលដែលទីក្រុងមូស្គូយល់ព្រម។

សហរដ្ឋអាមេរិក បាននិយាយក្នុងសេចក្តីថ្លែងការណ៍រួមជាមួយអ៊ុយក្រែន បន្ទាប់ពីកិច្ចប្រជុំនៅទីក្រុង Jeddah ថា ខ្លួននឹង "លុបចោលការផ្អាកភ្លាមៗលើការចែករំលែកព័ត៌មានចារកម្ម និងបន្តជំនួយសន្តិសុខដល់អ៊ុយក្រែនឡើងវិញ"។ មន្ត្រីអ៊ុយក្រែនមួយរូបបានបញ្ជាក់កាលពីថ្ងៃអង្គារថា ជំនួយសន្តិសុខរបស់អាមេរិកដល់អ៊ុយក្រែនបានដំណើរការឡើងវិញ។  

រដ្ឋមន្ត្រីការបរទេសអាមេរិក លោក Marco Rubio បាននិយាយភ្លាមៗបន្ទាប់ពីកិច្ចប្រជុំថា ទំនួលខុសត្រូវនៅពេលនេះ គឺអាស្រ័យលើប្រទេសរុស្ស៊ី ដើម្បីចាត់វិធានការបញ្ចប់សង្រ្គាម។យើងសង្ឃឹមថាពួកគេនឹងឆ្លើយថាយល់ព្រមដើម្បីសន្តិភាព។ បាល់ឥឡូវនេះ ស្ថិតនៅក្នុងដៃរបស់រុស្ស៊ី។

ក្រោយមក ប្រធានាធិបតីអាមេរិកលោក Donald Trump បានស្វាគមន៍ចំពោះព័ត៌មាននេះ ហើយបានប្តេជ្ញាថានឹងនិយាយជាមួយប្រធានាធិបតីរុស្ស៊ីលោក Vladimir Putin អំពីផែនការដ៏សំខាន់ក្នុងសប្តាហ៍នេះ៕