ប្រព័ន្ធផ្សព្វផ្សាយរដ្ឋអ៊ីរ៉ង់ បានរាយការណ៍កាលពីថ្ងៃអង្គារ (១១ មីនា) ថា លោកប្រធានាធិបតីអ៊ីរ៉ង់ Masoud Pezeshkian បានបន្តជំទាស់យ៉ាងដាច់ខាតថា ភាគីអ៊ីរ៉ង់នឹងមិនចរចាជាមួយសហរដ្ឋអាមេរិករឿងកម្មវិធីនុយក្លេអ៊ែរនោះឡើយក្នុងពេលត្រូវគំរាមកំហែង ដោយប្រាប់ទៅកាន់ប្រធានាធិបតីអាមេរិក លោក Donald Trump ថា "លោកចង់ធ្វើរឿងផ្ដេសផ្ដាសអ្វីក៏ធ្វើទៅ"។

ប្រព័ន្ធផ្សព្វផ្សាយរដ្ឋបានដកស្រង់សម្តីរបស់លោក Pezeshkian ថា "នេះជារឿងមិនអាចទទួលយកបានទេសម្រាប់អ៊ីរ៉ង់ ដែលអាមេរិក ចេញមកបញ្ជា និងគំរាមកំហែងបែបនេះ។ អ៊ីរ៉ង់នឹងមិនចរចាជាមួយអាមេរិកឡើយ ហើយទីក្រុងវ៉ាស៊ីនតោន ចង់ធ្វើរឿងផ្ដេសផ្ដាសអ្វីក៏ធ្វើទៅចុះ"។

មេដឹកនាំកំពូលរបស់អ៊ីរ៉ង់ លោក Ayatollah Ali Khamenei បានលើកឡើងកាលពីថ្ងៃសៅរ៍សប្ដាហ៍មុនថា ទីក្រុងតេអេរ៉ង់ នឹងមិនអាចត្រូវគំរាមកំហែង ឬបង្ខំឱ្យចូលតុចរចាទេ មួយថ្ងៃបន្ទាប់ពីលោក Trump និយាយថា លោកផ្ញើលិខិតមួយ ជំរុញឱ្យអ៊ីរ៉ង់ ចូលក្នុងកិច្ចចរចាលើកិច្ចព្រមព្រៀងនុយក្លេអ៊ែរថ្មីមួយ។

ខណៈដែលបង្ហាញពីការបើកចំហចំពោះកិច្ចព្រមព្រៀងជាមួយទីក្រុងតេអេរ៉ង់ លោក Trump ក៏បានស្តារឡើងវិញនូវយុទ្ធនាការ "សម្ពាធអតិបរមា" ដែលលោកបានអនុវត្តក្នុងអាណត្តិប្រធានាធិបតីដំបូងរបស់ខ្លួន ដើម្បីផ្តាច់អ៊ីរ៉ង់ពីសេដ្ឋកិច្ចពិភពលោក និងរុញច្រានការនាំចេញប្រេងរបស់អ៊ីរ៉ង់ឱ្យធ្លាក់ដល់សូន្យ ដើម្បីបង្ខំឱ្យចូលមកតុចរចារឿងកម្មវិធីនុយក្លេអ៊ែររបស់ខ្លួន។

អ៊ីរ៉ង់ បដិសេធជាយូរមកហើយថាមិនចង់បង្កើតអាវុធនុយក្លេអ៊ែរទេ ប៉ុន្តែទីភ្នាក់ងារ IAEA បានព្រមានថា ទោះយ៉ាងណាក៏ដោយ អ៊ីរ៉ង់បានបង្កើនល្បឿនយ៉ាងគ្រោះថ្នាក់នៃការចម្រាញ់សារធាតុអ៊ុយរ៉ានីញ៉ូម ដល់ភាពសុទ្ធ ៦០% ដែលខិតជិតដល់កម្រិតអាវុធប្រហែល ៩០% ទៅហើយ៕