បណ្ដាមេដឹកនាំពិភពលោក កាលពីថ្ងៃអង្គារ (១១ មីនា) បានស្វាគមន៍យ៉ាងកក់ក្ដៅនូវសំណើបទឈប់បាញ់រយៈពេល ៣០ថ្ងៃ ដែលអ៊ុយក្រែន បានយល់ព្រម ហើយបាននិយាយថា ឥឡូវនេះគឺអាស្រ័យលើរុស្ស៊ី ប៉ុណ្ណោះក្នុងការបញ្ចប់ការប្រយុទ្ធ។

គួរឱ្យដឹងថា អ៊ុយក្រែនបានយល់ព្រមទទួលយកសំណើរបស់អាមេរិក សម្រាប់បទឈប់បាញ់ ៣០ថ្ងៃភ្លាមៗ និងចាត់វិធានការឆ្ពោះទៅរកការស្តារសន្តិភាពយូរអង្វែង នេះបើយោងតាមសេចក្តីថ្លែងការណ៍រួមរបស់អាមេរិក និងអ៊ុយក្រែន ក្នុងកិច្ចប្រជុំនៅអារ៉ាប៊ីសាអ៊ូឌីត កាលពីថ្ងៃអង្គារ។ បន្ថែមពីលើនេះ ភាគីទាំងពីរក៏យល់ព្រមសម្រេចឱ្យបានឆាប់តាមដែលអាចធ្វើទៅបាននូវកិច្ចព្រមព្រៀងទូលំទូលាយសម្រាប់ការអភិវឌ្ឍធនធានរ៉ែដ៏សំខាន់របស់អ៊ុយក្រែន។

ប្រធានក្រុមប្រឹក្សាអឺរ៉ុប និងប្រធានគណៈកម្មការអឺរ៉ុប ក្នុងសេចក្តីថ្លែងការណ៍ដំណាលគ្នាលើបណ្ដាញសង្គម X បានស្វាគមន៍ព័ត៌មានស្តីពីកិច្ចចរចារវាងអាមេរិក និងអ៊ុយក្រែន រួមទាំងសំណើសម្រាប់កិច្ចព្រមព្រៀងបទឈប់បាញ់។ ប៉ូឡូញ និយាយថា នេះជាជំហានដ៏សំខាន់មួយឆ្ពោះទៅរកសន្តិភាព ខណៈបារាំង ចក្រភពអង់គ្លេស និងមេដឹកនាំអន្តរជាតិផ្សេងទៀតបានស្វាគមន៍យ៉ាងកក់ក្ដៅចំពោះរឿងនេះ។

សេតវិមាន អបអរវឌ្ឍភាពដ៏ល្អ ខណៈលោកប្រធានាធិបតី Donald Trump លើកឡើងថា លោកសង្ឃឹមថារុស្ស៊ី នឹងយល់ព្រមចំពោះផែនការនេះ។ មេដឹកនាំអ៊ុយក្រែន លោក Volodymyr Zelenskiy ក៏បានរីករាយនឹងដំណឹងនេះ ដោយនិយាយថា បទឈប់បាញ់គឺជា "សំណើវិជ្ជមាន" ដែលគ្របដណ្តប់ជួរមុខនៅក្នុងជម្លោះ មិនមែនគ្រាន់តែការប្រយុទ្ធគ្នាតាមផ្លូវអាកាស និងផ្លូវទឹកនោះទេ៕