ក្រុមមន្ត្រីប៉ាឡេស្ទីន បាននិយាយកាលពីថ្ងៃអង្គារសប្ដាហ៍នេះថា ការវាយប្រហាររបស់អ៊ីស្រាអែលបានសម្លាប់ជនជាតិប៉ាឡេស្ទីន៨នាក់នៅតំបន់ហ្កាហ្សាស្ទ្រីប និងបីនាក់ទៀតនៅតំបន់វេសប៊ែង ក្នុងរយៈពេល ២៤ ម៉ោងកន្លងមកនេះ ទោះបទឈប់បាញ់ដ៏ផុយស្រួយជាមួយក្រុមហាម៉ាសក្នុងតំបន់ហ្កាហ្សា បានធ្វើឡើងយ៉ាងទូលំទូលាយចាប់តាំងពីចុងខែមករាមកក៏ដោយ។

កងកម្លាំងអ៊ីស្រាអែលសម្លាប់ជនជាតិប៉ាឡេស្ទីនរាប់រយនាក់នៅហ្កាហ្សាក្នុងអំឡុងបទឈប់បាញ់ ដែលយោធានិយាយថា បានចូលទៅជិតកងទ័ពរបស់ខ្លួន ឬចូលទៅក្នុងតំបន់គ្មានការអនុញ្ញាត។

ក្រុមហាម៉ាស និយាយថា ការចរចាបទឈប់បាញ់ថ្មីបានចាប់ផ្តើមកាលពីថ្ងៃអង្គារ។ អ៊ីស្រាអែលចង់ឱ្យក្រុមហាម៉ាសដោះលែងចំណាប់ខ្មាំងពាក់កណ្តាលដែលនៅសេសសល់ជាថ្នូរនឹងការសន្យាក្នុងការ ចរចាបទឈប់បាញ់យូរអង្វែង។ប្រេសិតពិសេសអាមេរិក លោក Steve Witkoff និងគណៈប្រតភូមកពីអ៊ីស្រាអែល បានទៅដល់រដ្ឋធានីដូហា ប្រទេស កាតាដើម្បីពិភាក្សាបទឈប់បាញ់នៅហ្កាហ្សា។

ផ្ទុយទៅវិញ ក្រុមហាម៉ាស ចង់ចាប់ផ្តើមការចរចាលើដំណាក់កាលទីពីរដ៏លំបាកនៃបទឈប់បាញ់ ក្នុងនោះចំណាប់ខ្មាំងនៅសល់នឹងត្រូវបានដោះលែង ហើយកងកម្លាំងអ៊ីស្រាអែលនឹងដកចេញពីហ្កាហ្សា។គេជឿថាក្រុមហាម៉ាសមានចំណាប់ខ្មាំងនៅរស់២៤នាក់ និងសាកសព ៣៥ នាក់ផ្សេងទៀត។ 

អ៊ីស្រាអែលកំពុងព្យាយាមបង្ខំក្រុមហាម៉ាសឱ្យទទួលយកផែនការរបស់ខ្លួនដោយកាត់ផ្តាច់អគ្គិសនី អាហារ ឱសថ និងទំនិញផ្សេងទៀតទាំងអស់ដល់ប្រជាជនប៉ាឡេស្ទីនជាង ២ លាននាក់នៅហ្កាហ្សា។ អង្គការសហប្រជាជាតិ និងភ្នាក់ងារផ្តល់ជំនួយមនុស្សធម៌ផ្សេងទៀតនិយាយថា អ៊ីស្រាអែលកំពុងបំពានច្បាប់អន្តរជាតិ។ 

អង្គការសហប្រជាជាតិនិយាយថា ការហាមប្រាមរបស់អ៊ីស្រាអែលលើអាហារ ប្រេងឥន្ធនៈ អគ្គិសនី និងជំនួយមនុស្សធម៌ផ្សេងទៀតមិនឲ្យចូលហ្កាហ្សារយៈពេល១០ ថ្ងៃចុងក្រោយនេះ កំពុងកែប្រែវឌ្ឍនភាពក្នុងការទទួលបានការផ្គត់ផ្គង់ដល់ប្រជាជនប៉ាឡេស្ទីនរាប់ម៉ឺននាក់ក្នុងអំឡុងពេលប្រាំមួយសប្តាហ៍នៃបទឈប់បាញ់ ខណៈគ្រោះទុរភិក្សកើនឡើង៕