បន្ទាប់ពីដំណឹងសំណើបទឈប់បាញ់ក្នុងសង្រ្គាមបានលេចឡើងនៅថ្ងៃអង្គារ (១១ មីនា) ប្រជាពលរដ្ឋអ៊ុយក្រែនជាច្រើនបានសម្ដែងអារម្មណ៍របស់ខ្លួន ដោយនិយាយថា ពួកគេមិនជឿនោះទេ ដែលថារុស្ស៊ី នឹងយល់ព្រមលើបទឈប់បាញ់នោះ។ ស្រ្តីជនជាតិអ៊ុយក្រែនវ័យ ៣៦ឆ្នាំម្នាក់បានប្រាប់សារព័ត៌មានរ៉យទ័រថា "ទេ យើងមិនជឿទេថានឹងមានបទឈប់បាញ់ពីភាគីរុស្ស៊ី"។

នៅពេលត្រូវអ្នកសារព័ត៌មានសាកសួរថា តើរុស្ស៊ីអាចនឹងយល់ព្រមលើកិច្ចព្រមពញរៀងបទឈប់បាញ់ថ្មីនោះឬទេ អុ្នកស្រុកអ៊ុយក្រែនជាច្រើនផ្សេងទៀតបានលើកឡើងថា "រុស្ស៊ីនឹងមិនអាចព្រមនោះឡើយ"។ ពួកគេបន្ថែមថា "រុស្ស៊ីមិនដែលយល់ព្រមលើសំណើបែបនេះតាំងតែពីឆ្នាំ២០១៤ មក ដូច្នេះពលរដ្ឋអ៊ុយក្រែន មិនសូវជឿចិត្តភាគីរុស្ស៊ីនោះទេ។

ខណៈដែលសម្ដែងភាពវិជ្ជមាន និងរីករាយនឹងដំណឹងនេះ អ្នកស្រុកក៏និយាយផងដែរថា ពួកគេនៅតែមិនជឿឡើយថាអ៊ុយក្រែន អាចសម្រេចបានសន្តិភាព។

គួរបញ្ជាក់ថា អ៊ុយក្រែន បានយល់ព្រមទទួលយកសំណើរបស់សហរដ្ឋអាមេរិក សម្រាប់បទឈប់បាញ់ ៣០ថ្ងៃភ្លាមៗ និងចាត់វិធានការឆ្ពោះទៅរកការស្តារសន្តិភាពយូរអង្វែង បន្ទាប់ពីប្រតិបត្តិការយោធាពិសេសរបស់រុស្ស៊ី នេះបើយោងតាមសេចក្តីថ្លែងការណ៍រួមរបស់អាមេរិក និងអ៊ុយក្រែន ក្នុងកិច្ចប្រជុំនៅអារ៉ាប៊ីសាអ៊ូឌីត កាលពីថ្ងៃអង្គារ (១១ មីនា) ម្សិលមិញនេះ៕