ក្រសួងអប់រំសហរដ្ឋអាមេរិក បាននិយាយកាលពីថ្ងៃអង្គារ (១១ មីនា) ថា ខ្លួននឹងបញ្ឈប់ការងាររបស់បុគ្គលិកជិតពាក់កណ្តាល ក្នុងជំហានមួយដែលអាចបិទក្រសួងនេះទាំងមូល ខណៈភ្នាក់ងាររដ្ឋាភិបាល បានព្យាយាមដើម្បីបំពេញតាមកាលកំណត់របស់លោកប្រធានាធិបតី Donald Trump ក្នុងផែនការសម្រាប់រលកបញ្ឈប់ការងារទ្រង់ទ្រាយធំជាលើកទីពីរ។

ក្រសួងអប់រំបាននិយាយនៅក្នុងសេចក្តីប្រកាសព័ត៌មានថា ការបញ្ឈប់ការងារនេះគឺជាផ្នែកមួយនៃ "បេសកកម្មចុងក្រោយ" របស់ខ្លួន ដោយសំដៅលើការប្តេជ្ញាចិត្តរបស់លោក Trump ក្នុងការលុបបំបាត់ក្រសួងអប់រំ ដែលគ្រប់គ្រងប្រាក់ ១,៦សែនកោដិ៍ដុល្លារ នៅក្នុងកម្ចីមហាវិទ្យាល័យ អនុវត្តច្បាប់សិទ្ធិស៊ីវិលនៅក្នុងសាលារៀន និងផ្តល់មូលនិធិសហព័ន្ធសម្រាប់តំបន់ដែលខ្វះខាត។

នៅពេលត្រូវសាកសួរថា តើការបណ្ដេញចេញពីការងារនេះនឹងនាំទៅដល់ការរុះរើក្រសួងអប់រំឬអត់ រដ្ឋមន្រ្តីអប់រំ លោកស្រី Linda McMahon ឆ្លើយថា "ពិតហើយ! ការធ្វើដូច្នេះគឺជាបំណងរបស់លោកប្រធានាធិបតី"។ ការបញ្ឈប់ការងារនេះនឹងធ្វើឱ្យក្រសួងនៅសល់តែបុគ្គលិក ២.១៨៣នាក់ប៉ុណ្ណោះ ដោយធ្លាក់ចុះពីតួលេខ ៤.១៣៣នាក់ នៅពេលលោក Trump ទើបចូលកាន់តំណែងក្នុងខែមករា។

ការបណ្ដេញបុគ្គលិកទាំងនេះគឺជាជំហានចុងក្រោយបង្អស់ក្នុងកិច្ចខិតខំប្រឹងប្រែងយ៉ាងខ្លាំងក្លារបស់លោក Trump ដើម្បីកាត់បន្ថយកម្លាំងពលកម្មរបស់រដ្ឋាភិបាល ដែលដឹកនាំដោយលោកមហាសេដ្ឋី Elon Musk និងក្រសួងប្រសិទ្ធភាពរដ្ឋាភិបាលរបស់លោក៕