ក្រុមសកម្មប្រយុទ្ធហ៊ូទី របស់យេម៉ែន បានប្រកាសកាលពីថ្ងៃអង្គារ (១១ មីនា) ថា ពួកគេនឹងបន្តការវាយប្រហារលើនាវាអ៊ីស្រាអែល ដែលឆ្លងកាត់សមុទ្រក្រហម និងអារ៉ាប់ នៅច្រកសមុទ្រ Bab al-Mandab និងឈូងសមុទ្រ Aden ដោយបញ្ចប់រយៈពេលនៃភាពស្ងប់ស្ងាត់នៅដែនទឹក ដែលចាប់ផ្តើមពីខែមករា ជាមួយនឹងបទឈប់បាញ់នៅតំបន់ហ្កាហ្សា។

ក្រុមហ៊ូទី បានបើកការវាយប្រហារជាង ១០០លើក សំដៅលើការដឹកជញ្ជូនទំនិញចាប់ពីខែវិច្ឆិកា ឆ្នាំ២០២៣មក ដោយនិយាយថានេះជាសាមគ្គីភាពជាមួយប៉ាឡេស្ទីន ជុំវិញសង្គ្រាមអ៊ីស្រាអែល ជាមួយក្រុមហាម៉ាស នៅតំបន់ហ្កាហ្សា។ អំឡុងពេលនោះ ក្រុមប្រដាប់អាវុធនេះបានពន្លិចនាវាពីរគ្រឿង រឹបអូសយកនាវាមួយគ្រឿង និងសម្លាប់អ្នកធ្វើដំណើរតាមសមុទ្រយ៉ាងតិច ៤នាក់ នៅក្នុងការវាយលុកដែលរំខានដល់ការដឹកជញ្ជូនទូទាំងពិភពលោក។

មេដឹកនាំក្រុមហ៊ូទី បានព្រមានកាលពីថ្ងៃសុក្រសប្ដាហ៍មុនថា ក្រុមនេះនឹងបន្តប្រតិបត្តិការកងទ័ពជើងទឹករបស់ខ្លួនឡើងវិញប្រឆាំងនឹងអ៊ីស្រាអែល ប្រសិនបើអ៊ីស្រាអែល មិនដកការទប់ស្កាត់ជំនួយចូលហ្កាហ្សា ក្នុងរយៈពេល ៤ថ្ងៃទេនោះ គិតចាប់ពីថ្ងៃប្រកាសការព្រមាន។

បន្ទាប់ពីឱសានវាទនោះបានផុតកំណត់ ក្រុមហ៊ូទី ប្រកាសថា "ការវាយប្រហារនឹងបន្ត រហូតដល់ច្រកឆ្លងកាត់ជំនួយទៅកាន់តំបន់ហ្កាហ្សាត្រូវបានបើកឡើងវិញ"។ គួរឱ្យដឹងថា កាលពីថ្ងៃទី០២ ខែមីនា អ៊ីស្រាអែលបានរារាំងការចូលនៃរថយន្តជំនួយចូលទៅក្នុងហ្កាហ្សា ដោយសារការប្រឈមមុខដាក់គ្នាជុំវិញបទឈប់បាញ់ ហើយក្រុមហាម៉ាស បានអំពាវនាវឱ្យអ្នកសម្របសម្រួលអេហ្ស៊ីប និងកាតា ធ្វើអន្តរាគមន៍៕