សភាសហរដ្ឋអាមេរិកដែលគ្រប់គ្រងដោយគណបក្សសាធារណរដ្ឋ កាលពីថ្ងៃអង្គារ បានអនុម័តសេចក្តីស្នើច្បាប់ដំណោះស្រាយបណ្តោះអាសន្ន ដើម្បីរក្សាការផ្តល់មូលនិធិដល់ទីភ្នាក់ងារសហព័ន្ធ ដោយបញ្ចៀសការបិទរដ្ឋាភិបាលដោយផ្នែក ដែលនឹងចាប់ផ្តើមនៅចុងសប្តាហ៍នេះ ទោះបីជាលោកប្រធានាធិបតី Donald Trump កាត់បន្ថយរដ្ឋាភិបាលយ៉ាងច្រើនក៏ដោយ។

ការបន្តដំណោះស្រាយ ដែលភាគច្រើនរក្សាការផ្តល់មូលនិធិដល់រដ្ឋាភិបាល នៅក្នុងកម្រិតបច្ចុប្បន្នរហូតដល់ថ្ងៃទី៣០ខែកញ្ញា នឹងចាំបាច់ត្រូវបានអនុម័តដោយព្រឹទ្ធសភាភាគច្រើនមកពីគណបក្សសាធារណរដ្ឋ និងត្រូវបានចុះហត្ថលេខាដោយលោក Trump ឲ្យចូលទៅជាច្បាប់នៅថ្ងៃសុក្រ ដើម្បីបញ្ចៀសការបិទរដ្ឋាភិបាល។

លោក Trump បាននិងកំពុងជំរុញឱ្យក្រុមគណបក្សសាធារណរដ្ឋដើរស្របគ្នា ហើយអនុប្រធានាធិបតី លោក JD Vance បានជំរុញឱ្យសមាជិកសភាទាំងនោះរួមគ្នាជាធ្លុងមួយនៅឯកិច្ចប្រជុំបិទទ្វារ កាលពីថ្ងៃអង្គារ។

សមាជិកសភាគណបក្សសាធារណរដ្ឋដែលប្រកាន់តឹង បានជំទាស់ជាទៀងទាត់ចំពោះវិធានការដំណោះស្រាយបណ្តោះអាសន្ន ហើយការបោះឆ្នោតកាលពីថ្ងៃអង្គារ គឺជាលើកដំបូងហើយ ដែលសមាជិកទាំងនេះបានបោះឆ្នោតគាំទ្រ ចាប់តាំងពីគណបក្សនេះទទួលបានសំឡេងភាគច្រើននៅក្នុងសភា កាលពីខែមករាឆ្នាំ២០២៣។