នគរបាល និងក្រុមបះបោរ បាននិយាយថា ពួកសកម្មប្រយុទ្ធបំបែកខ្លួនបានបំផ្ទុះផ្លូវរថភ្លើង និងបើកការបាញ់ប្រហារលើរថភ្លើងដឹកអ្នកដំណើរនៅភាគនិរតីប្រទេសប៉ាគីស្ថានកាលពីថ្ងៃអង្គារ ១១ មីនាសប្ដាហ៍នេះ សម្លាប់មនុស្ស១០នាក់ និងចាប់ខ្លួនមនុស្សជាច្រើនជាចំណាប់ខ្មាំង និងប្រយុទ្ធជាមួយកងកម្លាំងសន្តិសុខ ដែលកំពុងធ្វើប្រតិបត្តិការជួយសង្គ្រោះ។ ក្រុមបះបោរនិយាយថា ពួកគេកំពុងឃុំខ្លួនមនុស្សចំនួន ២១៤ នាក់ ហើយបានគំរាមចាប់ផ្តើមសម្លាប់ពួកគេ។

ក្រុមសាច់ញ្ញាតិបានប្រមូលផ្ដុំគ្នាយ៉ាងអន្ទះសារនៅស្ថានីយ៍រថភ្លើងក្នុងទីក្រុង Quettaកាលពីថ្ងៃអង្គាររង់ចាំព័ត៌មានពីមនុស្សជាទីស្រឡាញ់របស់ពួកគេ។យោងតាមប្រភពព័ត៌មានបានឲ្យដឹងថា កងកម្លាំងសន្តិសុខរំដោះបានចំណាប់ខ្មាំង ១៥៥នាក់ ចេញពីក្រុមភេរវករដោយជោគជ័យ ពីអ្នកដំណើរប្រមាណ៤៥០នាក់ខណៈក្រុមសកម្មប្រយុទ្ធ២៧នាក់ស្លាប់ ក្រោយប្រតិបត្តិការសង្រ្គោះចំណាប់ខ្មាំងពីការប្លន់រថភ្លើងបានឈានចូលដល់ថ្ងៃទី២ ។ក្នុងនោះមានបុរស ៥៨នាក់ ស្រី៣១ នាក់ និងកុមារ១៥ នាក់ ។ ប្រភពនិយាយថា អ្នកដំណើរដែលរងរបួសចំនួន១៧នាក់ត្រូវបានបញ្ជូនទៅកាន់មន្ទីរពេទ្យនៅក្បែរនោះ ខណៈកិច្ចខិតខំប្រឹងប្រែងនៅបន្តដើម្បីធានាឱ្យមានការដោះលែងអ្នកដំណើរដែលនៅសេសសល់ដោយសុវត្ថិភាព។

លោកបាននិយាយថា កម្លាំងសន្តិសុខបានបើកប្រតិបត្តិការដ៏ធំ ដោយបន្ថែមថាឧទ្ធម្ភាគចក្រ និងកងកម្លាំងពិសេស ត្រូវបានដាក់ពង្រាយ។ ក្រុមភេរវករ១៦នាក់ត្រូវបានសម្លាប់ក្នុងប្រតិបត្តិការសង្រ្គោះចំណាប់ខ្មាំង។

ក្រុមអាជ្ញាធរមូលដ្ឋាន នគរបាល និងមន្ត្រីផ្លូវដែក បាននិយាយថា រថភ្លើងបានជាប់ក្នុងផ្លូវក្រោមដី ហើយអ្នកបើកបរបានស្លាប់ បន្ទាប់ពីរងរបួសធ្ងន់ធ្ងរ។

កងទ័ពរំដោះ Baloch ដែលជាក្រុមសកម្មប្រយុទ្ធផ្តាច់ខ្លួនបាននិយាយថា ខ្លួនបានបំផ្ទុះផ្លូវរថភ្លើង ហើយ "បានគ្រប់គ្រងរថភ្លើងភ្លាមៗ" ។ ក្រុមនេះបាននិយាយថាខ្លួននឹងប្រហារជីវិតមនុស្ស១០នាក់ជាការឆ្លើយតបចំពោះប្រតិបត្តិការយោធាដែលកំពុងបន្ត៕