ក្រុមតារាវិទូបានរកឃើញព្រះចន្ទថ្មីចំនួន ១២៨ដួង ធ្វើដំណើរគោចរជុំវិញភពសៅរ៍ ដែលធ្វើឱ្យភពនេះនាំមុខគេយ៉ាងខ្លាំងក្នុងការមានចំនួនព្រះចន្ទច្រើនជាងគេនៅក្នុងប្រព័ន្ធព្រះអាទិត្យ។ ថ្មីៗនេះ ឋានៈ "ស្តេចព្រះចន្ទ" ត្រូវបានកាន់កាប់ដោយភពព្រហស្បតិ៍ ដែលមានព្រះចន្ទ ៩៥ដួង ប៉ុន្តែឥឡូវនេះ ភពសៅរ៍មានព្រះចន្ទសរុប ២៧៤ដួង ដែលស្មើនឹង ២ដងនៃចំនួនព្រះចន្ទនៅភពផ្សេងទៀតទាំងអស់។

ក្រុមតារាវិទូ ដែលនៅពីក្រោយការរកឃើញពីមុន បានកំណត់អត្តសញ្ញាណព្រះចន្ទនៅភពសៅរ៍ ថាមានចំនួន ៦២ដួងប៉ុណ្ណោះ ដោយប្រើតេឡេស្កុបកាណាដា France Hawaii ហើយដោយឃើញមានតម្រុយថាមានច្រើនទៀតនៅទីនោះ ក្រុមអ្នកវិទ្យាសាស្រ្តក៏ធ្វើការសង្កេតបន្ថែមទៀតក្នុងឆ្នាំ២០២៣។

លោក Edward Ashton បណ្ឌិតនៅវិទ្យាស្ថានសម្រាប់តារាសាស្ត្រ និងរូបវិទ្យានៅវិទ្យាស្ថាន Academia Sincia ក្នុងកោះតៃវ៉ាន់ ដែលជាអ្នកស្រាវជ្រាវនាំមុខគេលើរឿងនេះ បាននិយាយថា "តារាវិទូបានរកឃើញព្រះចន្ទថ្មី ១២៨ដួង ហើយផ្អែកលើការព្យាករ ភពព្រហស្បតិ៍ប្រហែលជាតាមមិនទាន់តួលេខនេះឡើយ"។

ព្រះចន្ទទាំងនោះត្រូវបានគេកំណត់អត្តសញ្ញាណដោយប្រើបច្ចេកទេសមួយ ដែលអ្នកតារាវិទូបកស្រាយរូបភាពបន្តបន្ទាប់គ្នាដែលតាមដានបានពីគន្លងរបស់ព្រះចន្ទឆ្លងកាត់ផ្ទៃមេឃ រួចដាក់បញ្ចូលគ្នាដើម្បីធ្វើឱ្យព្រះចន្ទទាំងនោះមានសញ្ញាពន្លឺគ្រប់គ្រាន់។ ព្រះចន្ទថ្មីទាំង ១២៨ដួងនោះ គឺជា "ព្រះចន្ទមិនទៀងទាត់" និងជាកញ្ចុំពន្លឺមានរាងដូចដំឡូងបារាំង ដែលមានចម្ងាយតែប៉ុន្មានគីឡូម៉ែត្រពីគ្នាប៉ុណ្ណោះ៕