ការិយាល័យរបស់លោក បាននិយាយថា  ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) កាលពីថ្ងៃអង្គារ បានអំពាវនាវដល់ប្រមុខយោធាមកពីទូទាំងទ្វីបអឺរ៉ុប និងលើសពីនេះ ឲ្យរៀបចំផែនការ «ដើម្បីកំណត់ការធានាសន្តិសុខគួរឲ្យជឿទុកចិត្តបាន» សម្រាប់អ៊ុយក្រែន នៅក្នុងព្រឹត្តិការណ៍នៃបទឈប់បាញ់។

នៅក្នុងកិច្ចប្រជុំបិទទ្វារនៅទីក្រុងប៉ារីសនៃមន្ត្រីជាន់ខ្ពស់មកពីរដ្ឋសម្ព័ន្ធមិត្តជាង ៣០ ការអំពាវនាវរបស់លោក បានកើតមានឡើង នៅពេលដែលអ៊ុយក្រែន បានអនុម័តលើសំណើរបស់អាមេរិកសម្រាប់បទឈប់បាញ់រយៈពេល មួយខែ ហើយបានយល់ព្រមក្នុងការចរចាភ្លាមៗ ជាមួយរុស្ស៊ី នៅក្នុងកិច្ចពិភាក្សាដ៏សំខាន់នៅប្រទេសអារ៉ាប៊ីសាអ៊ូឌីត។

លោក ម៉ាក្រុង បានស្វែងរកការប្រមូលផ្តុំការឆ្លើយតបរបស់អឺរ៉ុប ចំពោះការផ្លាស់ប្តូរគោលនយោបាយដ៏គួរឲ្យភ្ញាក់ផ្អើលរបស់ទីក្រុងវ៉ាស៊ីនតោន ក្នុងទំនាក់ទំនងអាមេរិក និងរុស្ស៊ី។

កិច្ចប្រជុំនៅទីក្រុងប៉ារីស បានប្រមូលផ្តុំតំណាងមកពីប្រទេសចំនួន ៣៤ ដែលភាគច្រើនមកពីអឺរ៉ុប និងអង្គការណាតូ ប៉ុន្តែក៏មានប្រទេសអូស្ត្រាលី នូវែលសេឡង់ និងជប៉ុនផងដែរ។

ពុំមានតំណាងមកពីសហរដ្ឋអាមេរិក ដែលជាសមាជិកឈានមុខគេរបស់អង្គការណាតូ ចូលរួមទេ។