​​វាយ​សី៖ ​ម្ចាស់​មេដាយមាស​អូឡាំពិក​ទីក្រុង​តូ​ក្យូ​កីឡាករ​ដា​ណឺ​ម៉ាក Viktor Axelsen បាន​បន្តដំណើរ​ឡើង​វគ្គ ១៦នាក់​ចុងក្រោយ​នៃ​ការប្រកួត​វាយ​សី​ពានរង្វាន់ Indonesian Open ដែល​រៀបចំ​នៅ​កោះ​បាលី​ប្រទេស​ឥណ្ឌូនេស៊ី​។ ​​កីឡាករ​លំដាប់​លេខ ២ ពិភពលោក​រូបនេះ​បាន​ចំណាយពេល​ត្រឹម ៤៣នាទី​ប៉ុណ្ណោះ​ដើម្បី​យក​ឈ្នះ​គូប្រកួត​កីឡាករ​ជប៉ុន Koki Watanabe ដោយ​លទ្ធផល ២​សិត​ផ្ទួនៗ ២១-១៤ និង ២១-១៤ ដែល​ជា​ការចាប់ផ្តើម​បាន​យ៉ាង​ល្អ​ក្នុង​ព្រឹត្តិការណ៍ Indonesian Open ដែលជា​ការបង្ហាញ​ខ្លួន​លើក​ទី​៨ របស់​ខ្លួន​។​

​ងាក​មក​លទ្ធផល​ផ្សេងទៀត​វិញ ម្ចាស់​មេដាយ​សំរឹទ្ធ​នៅ​តូ​ក្យូ​កីឡាករ​ម្ចាស់ផ្ទះ​ឥណ្ឌូនេស៊ី Anthony Sinisuka Ginting ចាប់ផ្តើមបាន​មិនបាន​ល្អ​ឡើយ​ក្រោយ​ចាញ់​កីឡាករ​បារាំង Christo Popov ២១-១៧ និង ២១-១៨​។ ​ចំណែក​ការប្រកួត​វាយ​គូ​បុរស​កីឡាករ​ឥណ្ឌូនេស៊ី​ទាំងពីរ​នាក់ Pramudya Kusumawardana និង Yeremia Erich Yoche Yacob បាន​យកឈ្នះ​ដៃគូ​អង់គ្លេស Ben Lane និង Sean Vendy ដោយ​លទ្ធផល ១៨-២១, ២១-១៧ និង ២១-៩​។ ​​ដៃគូ​ឆៃ​នី​ស​តៃប៉ិ Lu Ching Yao និង Yang Po Hang ក៏បាន​បន្តដំណើរ​ទៅ​ជុំ​បន្ត​ដែរ​ក្រោយ​យកឈ្នះ​ដៃគូ​រុស្ស៊ីលំដាប់​លេខ ៨ ពិភពលោក Vladimir Ivanov និង Ivan Sozonov ២១-១៧, ១៥-២១ និង ២១-១៩​។​ ​ងាក​មក​ការប្រកួត​វាយ​គូ​ចំរុះ​បុរស​នារី​ដៃគូ​ដា​ណឺ​ម៉ាក​កីឡាករ Mathias Christiansen និង​កីឡាការិនី Alexandra Boje បាន​ចំណាយពេល ៥៩នាទី​ដើម្បី​យកឈ្នះ​ដៃគូ​ឥណ្ឌូនេស៊ី​កីឡាករ Rinov Rivaldy និង​កីឡាការិនី Pitha Haningtyas លទ្ធផល ២១-១៤, ១៣-២១ និង ២១-១៦៕

​អត្ថបទ​៖​នាង សុភា​វុ​ធ