អាជ្ញាធរអ៊ុយក្រែនបាននិយាយនៅថ្ងៃពុធនេះថា ការវាយប្រហារដោយមីស៊ីលបាលីស្ទីករបស់រុស្ស៊ីនៅពេលយប់ទៅលើទីក្រុងកំពង់ផែ Odesa ភាគខាងត្បូងប្រទេសអ៊ុយក្រែន បានសម្លាប់មនុស្ស ៤នាក់ និងបានធ្វើឲ្យខូចខាតដល់នាវាដឹកទំនិញ ដែលមានទង់ជាតិរបស់ប្រទេសបាបាដូស (Barbados)។

ការវាយប្រហារកាលពីល្ងាចថ្ងៃអង្គារ បានកើតឡើង នៅពេលដែលអ៊ុយក្រែនគាំទ្រសំណើរបស់អាមេរិកសម្រាប់បទឈប់បាញ់រយៈពេល ៣០ថ្ងៃ ហើយបានយល់ព្រមចំពោះការចរចាជាបន្ទាន់ ជាមួយរុស្ស៊ី។

មន្ត្រីអ៊ុយក្រែន បាននិយាយថា ការវាយប្រហារ បានកើតឡើង ខណៈដែលនាវាដឹកទំនិញ កំពុងផ្ទុកគ្រាប់ធញ្ញជាតិ ដែលមានបំណងបញ្ជូនទៅកាន់ប្រទេសអាល់ហ្សេរី។

លោក Oleksiy Kuleba ឧបនាយករដ្ឋមន្ត្រីទទួលបន្ទុកការកសាងឡើងវិញ បានសរសេរនៅលើប្រព័ន្ធផ្សព្វផ្សាយសង្គមថា៖«ជាអកុសល មនុស្ស ៤នាក់ បានស្លាប់ គឺជាពលរដ្ឋនៃប្រទេសស៊ីរី។ ជនរងគ្រោះក្មេងជាងគេ មានអាយុ ១៨ឆ្នាំ និងចាស់ជាងគេ អាយុ ២៤ឆ្នាំ។ មនុស្សពីរនាក់ទៀត បានរងរបួស គឺជនជាតិអ៊ុយក្រែនម្នាក់ និងម្នាក់ទៀត គឺជាជនជាតិស៊ីរី»។

លោកបានបន្ថែមថា៖«រុស្ស៊ីកំពុងវាយប្រហារលើហេដ្ឋារចនាសម្ព័ន្ធរបស់អ៊ុយក្រែន រួមទាំងកំពង់ផែដែលពាក់ព័ន្ធនឹងការធានាសន្តិសុខស្បៀងអាហាររបស់ពិភពលោក ផងនោះ» ។