នៅថ្ងៃពុធនេះ ក្រុមគ្រួសារជនរងគ្រោះដែលត្រូវបានសម្លាប់នៅក្នុងសង្រ្គាមគ្រឿងញៀនរបស់អតីតប្រធានាធិបតីហ្វីលីពីនលោក Rodrigo Duterte បានទាមទារឲ្យមានការទទួលខុសត្រូវច្រើនជាងនេះ ក្នុងការស៊ើបអង្កេតលើរដ្ឋបាលរបស់អតីតមេដឹកនាំម្នាក់នេះ ។

អ្នកស្រី Emily Soriano គឺជាម្តាយរបស់ក្មេងប្រុសអាយុ ១៥ឆ្នាំម្នាក់ ដែលត្រូវបានសម្លាប់នៅក្នុងវិធានការបោសសម្អាតរបស់លោក Duterte កាលពីឆ្នាំ ២០១៦ បាននិយាយប្រាប់សន្និសីទសារព័ត៌មាននៅទីក្រុងម៉ានីលថា កូនប្រុសរបស់គាត់ ត្រូវបានគេបាញ់សម្លាប់យ៉ាងព្រៃផ្សៃបំផុត ហើយអ្នកស្រីបានជំរុញសាធារណជន មិនត្រឹមតែឲ្យលោក Duterte ទទួលខុសត្រូវម្នាក់ឯងប៉ុណ្ណោះទេ ប៉ុន្តែក្រុមមន្រ្តីផ្សេងទៀតផងដែរ ។

លោក Duterte គឺជាអតីតអភិបាលក្រុង និងជាអតីតរដ្ឋអាជ្ញាដែលបានដឹកនាំប្រទេសហ្វីលីពីនចាប់ពីឆ្នាំ ២០១៦ រហូតដល់ឆ្នាំ ២០២២ ត្រូវបានចាប់ខ្លួនកាលពីព្រឹកថ្ងៃអង្គារ ជាការចាប់ផ្តើមជំហានធំបំផុតពុំធ្លាប់មាននៅក្នុងការស៊ើបអង្កេតរបស់តុលាការព្រហ្មទណ្ឌអន្តរជាតិ(ICC) ជុំវិញឧក្រិដ្ឋកម្មចោទប្រកាន់ប្រឆាំងមនុស្សជាតិ អំឡុងយុទ្ធនាការបោសសម្អាតគ្រឿងញៀនដែលបានសម្លាប់មនុស្សរាប់ពាន់នាក់ ហើយនិងទទួលបានការថ្កោលទោសនៅជុំវិញពិភពលោក ។

គួរឲ្យដឹងថា លោកDuterte ត្រូវបានបញ្ជូនទៅទីក្រុងឡាអេ ប្រទេសហូឡង់ កាលពីថ្ងៃអង្គារម្សិលមិញ រយៈប៉ុន្មានម៉ោងប៉ុណ្ណោះបន្ទាប់ពីលោកត្រូវចាប់ខ្លួននៅទីក្រុងម៉ានីល តាមសំណើរបស់តុលាការ ICC ។

លោក Duterte វ័យ ៧៩ឆ្នាំ អាចនឹងក្លាយជាអតីតប្រមុខរដ្ឋអាស៊ីលើកដំបូងគេ ដែលត្រូវឡើងសវនាការនៅ តុលាការ ICC ។ 

ខណៈពេលនោះដែរ ប្រធានាធិបតីហ្វីលីពីន លោក Ferdinand Marcos Jr បាននិយាយបានប្រាប់សន្និសីទសារព័ត៌មានថា យន្តហោះបានធ្វើដំណើរទៅកាន់ទីក្រុងឡាអេ ប្រទេសហូឡង់ ដែលអនុញ្ញាតឲ្យអតីតប្រធានាធិបតីរូបនេះប្រឈមនឹងការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ ទាក់ទងនឹងសង្គ្រាមដ៏បង្ហូរឈាមរបស់លោកលើគ្រឿងញៀន ។ 

ទោះបីជាយ៉ាងណាក៏ដោយ លោក Duterte បាននិយាយយ៉ាងទទូចជាយូរមកហើយថា លោកបានណែនាំនគរបាលឲ្យតដៃតែក្នុងករណីដើម្បីការពារខ្លួនប៉ុណ្ណោះ ហើយតែងតែការពារការបង្រ្កាបនោះ ដោយប្រាប់អ្នកគាំទ្រម្តងហើយម្តងទៀតថា លោកត្រៀមខ្លួនរួចជាស្រេចដើម្បី ជាប់ពន្ធនាគារ ប្រសិនបើវិធានការរបស់លោកអាចកម្ចាត់គ្រឿងញៀនខុសច្បាប់ចេញពីហ្វីលីពីនបាន ៕