ជប៉ុន នៅថ្ងៃពុធ (ទី១២ ខែមីនា) នេះ បានលើកឡើងថា វាគឺជារឿង «គួរឲ្យសោកស្តាយ» ដែលប្រទេសមិនអាចទទួលបានការលើកលែងពីការដំឡើងពន្ធ ២៥ភាគរយរបស់ប្រធានាធិបតីអាមេរិក លោក Donald Trump លើដែកថែប និងអាលុយមីញ៉ូម។

នៅពេលត្រូវបានសួរថា តើជប៉ុនកំពុងពិចារណាវិធានការសងសឹក ឬយ៉ាងណានោះ អ្នកនាំពាក្យជាន់ខ្ពស់របស់រដ្ឋាភិបាល លោក Yoshimasa Hayashi បាននិយាយថា ប្រទេសទាំង២ នឹងបន្តពិភាក្សាលម្អិត អំពីកាតព្វកិច្ចពន្ធ ដែលចូលជាធរមាននៅពាក់កណ្តាលអធ្រាត្រ តាមពេលវេលាម៉ោងនៅសហរដ្ឋអាមេរិក។

លោក Hayashi បានប្រាប់អ្នកសារព័ត៌មានថា៖ «វិធានការរីករាលដាលយ៉ាងទូលំទូលាយ ដើម្បីរឹតបន្តឹងពាណិជ្ជកម្មនេះ បង្កជាហានិភ័យឲ្យមានផលប៉ះពាល់យ៉ាងធំដល់ទំនាក់ទំនងសេដ្ឋកិច្ចជប៉ុន-អាមេរិក ក៏ដូចជាសេដ្ឋកិច្ចពិភពលោក និងប្រព័ន្ធពាណិជ្ជកម្មពហុភាគីផងដែរ»។

លោកបានបន្ថែមថា៖ «ការដែលជប៉ុនមិនត្រូវបានដកចេញពីការដំឡើងពន្ធបន្ថែម គឺជារឿងគួរឲ្យសោកស្ដាយខ្លាំងណាស់»។

គួរបញ្ជាក់ថា បើយោងតាមទីក្រុងវ៉ាស៊ីនតោន បានឲ្យដឹងថា ប្រទេសជប៉ុនបាននាំចេញដែកថែបប្រហែល ៣១,៥ លានតោន ក្នុងឆ្នាំ២០២៤ ដែលក្នុងនោះ ១,១លាន បាននាំទៅសហរដ្ឋអាមេរិក ពោលគឺប្រហែល ៤ភាគរយនៃការនាំចូលដែកថែបរបស់ប្រទេសនេះ៕