ប្រជាពលរដ្ឋដែលត្រូវបានធ្វើសម្ភាសន៍ដោយទីភ្នាក់ងារព័ត៌មានរ៉យទ័រនៅថ្ងៃពុធនេះ បានបង្ហាញទស្សនៈខុសប្លែកគ្នាចំពោះបទឈប់បាញ់ស្នើសុំរយៈពេល ៣០ថ្ងៃរបស់សហរដ្ឋអាមេរិកនៅអ៊ុយក្រែន ។

ស្របពេលដែលពលរដ្ឋមួយចំនួននិយាយថា ពួកគេសង្ឃឹមថា កិច្ចប្រជុំស្វែងរកសន្តិភាពអាចនឹងបញ្ឈប់ការបង្ហូរឈាមគ្នានោះ ពលរដ្ឋខ្លះទៀត និយាយថា ពួកគេនៅមានមន្ទិលសង្ស័យថាតើកិច្ចព្រមព្រៀងស្នើសុំនេះ នឹងផ្តល់អត្ថប្រយោជន៍ដល់រុស្ស៊ីដែរឬទេ ។

លោក Vadimគឺជាពលរដ្ឋមួយរូបរស់នៅក្នុងទីក្រុងម៉ូស្គូ និយាយថា ប្រាកដខ្លាំងណាស់ថា សម្រាប់ពួកយើង វាគឺបទឈប់បាញ់ស្នើសុំមិនល្អនោះទេ ពិព្រោះថា ពួកយើងមានប្រៀប និងគុណសម្បត្តិរួចទៅហើយនៅលើសមរភូមិប្រយុទ្ធ ។

លោកបន្តថា ឥឡូវពួកយើងរំដោះបានមកវិញដែនដីរបស់ពួកយើងនៅតំបន់ Kursk ។ នោះហើយគឺជាហេតុផលដែលវាមិនត្រឹមត្រូវ និងមិនយុត្តិធម៌ក្នុងការទទួលយកបទឈប់បាញ់ ពេលដែលសត្រូវរបស់ពួកយើង កំពុងទន់ខ្សោយនោះ ។

គួរឲ្យដឹងថា ក្រោយកិច្ចប្រជុំរយៈពេលជាង ៨ម៉ោងជាមួយក្រុមមន្រ្តីអ៊ុយក្រែននៅក្នុងទីក្រុង Jeddahប្រទេសអារ៉ាប៊ីសាអ៊ូឌីត កាលពីថ្ងៃអង្គារ រដ្ឋមន្រ្តីការបរទេសសហរដ្ឋអាមេរិកលោក Marco Rubio និយាយថា សហរដ្ឋអាមេរិកនឹងផ្តល់ជូនបទឈប់បាញ់រយៈពេល ៣០ថ្ងៃនៅអ៊ុយក្រែនដែលទទួលយកដោយក្រុមមន្រ្តីអ៊ុយក្រែន ដល់រុស្ស៊ី ។

អ៊ុយក្រែន បាននិយាយកាលពីថ្ងៃអង្គារថា ពួកគេត្រៀមខ្លួនរួចរាល់ក្នុងការគាំទ្រសំណើរបស់សហរដ្ឋអាមេរិកសម្រាប់បទឈប់បាញ់រយៈពេល ៣០ថ្ងៃជាមួយរុស្ស៊ី ៕