វិមានក្រឹមឡាំង និយាយនៅថ្ងៃពុធនេះថា ខ្លួនត្រូវទទួលបានការសង្ខេបពីសហរដ្ឋអាមេរិកលើលទ្ធផលនៃកិច្ចពិភាក្សារវាងសហរដ្ឋអាមេរិក-អ៊ុយក្រែន នៅប្រទេសអារ៉ាប៊ីសាអ៊ូឌីត មុនពេលធ្វើសេចក្តីអត្ថាធិប្បាយថាតើបទឈប់បាញ់ស្មើសុំនៅអ៊ុយក្រែន អាចទទួលបានដែរឬទេសម្រាប់រុស្ស៊ី ។

អ៊ុយក្រែន បាននិយាយកាលពីថ្ងៃអង្គារថា ពួកគេត្រៀមខ្លួនរួចរាល់ក្នុងការគាំទ្រសំណើរបស់សហរដ្ឋអាមេរិកសម្រាប់បទឈប់បាញ់រយៈពេល ៣០ថ្ងៃជាមួយរុស្ស៊ី ហើយរដ្ឋមន្រ្តីការបរទេសសហរដ្ឋអាមេរិកលោក Marco Rubio និយាយថា អាមេរិកនឹងផ្តល់បទឈប់បាញ់ដល់រុស្ស៊ី ។

អ្នកនាំពាក្យវិមានក្រឹមឡាំងលោក Dmitry Peskov និយាយថា ទីក្រុងម៉ូស្គូរំពឹងថានឹងទទួលបានការសង្ខេបព័ត៌មានពីលោក Rubio និងទីប្រឹក្សាសន្តិសុខជាតិសេតវិមានលោក Mike Waltz ក្នុងរយៈពេលប៉ុន្មានថ្ងៃខាងមុខនេះ ស្តីពីលទ្ធផលនៃកិច្ចប្រជុំកាលពីថ្ងៃអង្គារជាមួយអ៊ុយក្រែននៅក្នុងទីក្រុង Jeddah ។

លោក Peskov និយាយផងដែរថា លោកពុំច្រានចោលនោះឡើយលទ្ធភាពនៃការជជែកគ្នាតាមទូរស័ព្ទរវាងប្រធានាធិបតីរុស្ស៊ីលោក Vladimir Putin និងលោក Donald Trump ហើយវាអាចនឹងត្រូវរៀបចំឡើងយ៉ាងឆាប់រហ័ស បើសិនជាចាំបាច់ ។

នៅពេលសួរអំឡុងសន្និសីទសារព័ត៌មានតាមទូរស័ព្ទប្រចាំថ្ងៃរបស់លោក ថាតើសំណើបទឈប់បាញ់រយៈពេល ៣០ថ្ងៃ មានគុណសម្បត្តិ ឬមិនមានគុណសម្បត្តិចំពោះរុស្ស៊ី ហើយនិងថាតើរុស្ស៊ីនឹងផ្សាភ្ជាប់លទ្ធភាពនៃបទឈប់បាញ់ជាមួយនឹងការទាមទារផ្សេងទៀតដែរឬទេ ដូចជាការដកចេញទណ្ឌកម្មលោកខាងលិចលើទីក្រុងម៉ូស្គូនោះ លោក Peskovឆ្លើយតបថា អ្នកសួរដូចជាលឿនពេកហើយ ។ 

លោកបន្តថា កាលពីថ្ងៃម្សិលមិញ ពេលនិយាយទៅកាន់សារព័ត៌មាន ទាំងលោក Rubio និងលោក Waltz និយាយថា ពួកគេនឹងបញ្ជូនព័ត៌មានលម្អិតដល់ពួកយើង តាមរយៈបណ្តាញជាច្រើនពីខ្លឹមសារនៃកិច្ចសន្ទនាដែលបានកើតឡើងនៅទីក្រុង Jeddah ។ ដំបូងពួកយើងត្រូវការទទួលបានព័ត៌មាននេះជាមុនសិន ៕