ក្រុមអ្នកស្រាវជ្រាវ និងក្រុមគ្រូពេទ្យនិយាយនៅថ្ងៃពុធនេះថា បុរសជនជាតិអូស្រ្តាលីដែលមានជំងឺខ្សោយបេះដូងធ្ងន់ធ្ងរ បានក្លាយជាមនុស្សលើកដំបូងគេនៅលើពិភពលោក ចាកចេញពីមន្ទីរពេទ្យជាមួយនឹងការប្តូរបេះដូងសិប្បនិម្មិត ។

ការវះកាត់រយៈពេល ៦ម៉ោង បានធ្វើឡើងកាលពីចុងខែវិច្ឆិកា ឆ្នាំ ២០២៤នៅមន្ទីរពេទ្យ St Vincent’s Hospital Sydney ហើយក្រោយមកអ្នកជំងឺវ័យ ៤០ឆ្នាំ បានចេញពីមន្ទីរពេទ្យជាមួយបេះដូងសិប្បនិម្មិត BiVACOR នៅដើមខែកុម្ភៈកន្លងទៅ ។

បេះដូងសិប្បនិម្មិត BiVACOR ត្រូវបានបង្កើតឡើងដោយអ្នកវិទ្យាសាស្រ្តអូស្ត្រាលីលោកវេជ្ជបណ្ឌិត Daniel Timms និងជាឧបករណ៍អាចផ្សំាបានលើកដំបូងរបស់ពិភពលោក ដែលអាចដើរតួជំនួសលក្ខណៈពេញលេញសម្រាប់បេះដូងមនុស្សចម្លងផ្នែកទាំងសងខាងនៃសរីរាង្គមួយនេះ ។

ការប្តូរបេះដូងនេះ ត្រូវបានបង្កើតឡើងជាស្ពានបន្តឲ្យអ្នកជំងឺមានជីវិតរហូតដល់មានការប្តូរបេះដូងរបស់អ្នកបរិច្ចាគ ប៉ុន្តែគោលដៅរបស់លោក Timmsសម្រាប់ឧបករណ៍សិប្បនិម្មិតមួយនេះ នៅថ្ងៃណាមួយក្លាយជាដំណោះស្រាយអចិន្រ្តៃយ៍ ។

អ្នកជំងឺម្នាក់នេះ គឺជាមនុស្សទី ៦នៅលើពិភពលោកទទួលបានបេះដូងសិប្បនិម្មិត BiVACOR ហើយនិងជាជនជាតិអូស្រ្តាលីលើកដំបូងគេ ទទួលបាននីតិវិធីមួយនេះ ។ គាត់គឺជាមនុស្សម្នាក់គត់ក្នុងចំណោមអ្នកជំងឺ ៦នាក់ ដែលបានចាកចេញពីមន្ទីរពេទ្យជាមួយបេះដូងសិប្បនិម្មិត ខណៈដែលជំងឺ ៥នាក់ផ្សេងទៀត បន្តព្យាបាលនៅក្នុងមន្ទីរពេទ្យ រង់ចាំការប្តូរបេះដូងរបស់អ្នកបរិច្ចាគ ។

ដោយឡែក អ្នកជំងឺអូស្រ្តាលីម្នាក់ទៀត បានទទួលការវះកាត់ដោយជោគជ័យ សម្រាប់ការប្តូរបេះដូងរបស់អ្នកបរិច្ចាគក្នុងខែនេះ ហើយបច្ចុប្បន្នកំពុងជាសះស្បើយយ៉ាងល្អ ៕