លោកប្រធានាធិបតី Donald Trump បាននិយាយថាក្រុមមន្ត្រីអាមេរិកកំពុងធ្វើដំណើរទៅកាន់ប្រទេសរុស្ស៊ីកាលពីថ្ងៃពុធសប្ដាហ៍នេះដើម្បីពិភាក្សាអំពីកិច្ចព្រមព្រៀងរវាងសហរដ្ឋអាមេរិក និងអ៊ុយក្រែនស្តីពីការផ្អាកការប្រយុទ្ធគ្នា រយៈពេល ៣០ ថ្ងៃដែលបានស្នើឡើងក្នុងជំនួបនៅអារ៉ាប៊ីសាអ៊ូឌីតកាលពីថ្ងៃអង្គារសប្ដាហ៍នេះ និងផ្លូវឆ្ពោះទៅរកកិច្ចចរចាសន្តិភាព។

លោក Trump បាននិយាយថា ឥឡូវនេះអាស្រ័យលើប្រទេសរុស្ស៊ី បន្ទាប់ពីអ៊ុយក្រែនបានយល់ព្រមលើបទឈប់បាញ់មួយក្នុងអំឡុងពេលកិច្ចពិភាក្សាជាងប្រាំបីម៉ោងកាលពីថ្ងៃអង្គារជាមួយក្រុមមន្ត្រីសហរដ្ឋអាមេរិកនៅក្នុងប្រទេសអារ៉ាប៊ីសាអ៊ូឌីត។

លោក Trump បានប្រាប់អ្នកសារព័ត៌មានក្នុងការិយាល័យប្រធានាធិបតីថាសង្ឃឹមថាយើងអាចទទួលបានបទឈប់បាញ់ពីប្រទេសរុស្ស៊ី។លោកបានទទួលសារវិជ្ជមានមួយចំនួន ប៉ុន្តែសារវិជ្ជមាន មានន័យថាគ្មានអ្វីសោះ។ នេះគឺជាស្ថានភាពធ្ងន់ធ្ងរណាស់។

វិមានក្រឹមឡាំងបាននិយាយកាលពីថ្ងៃពុធសប្ដាហ៍នេះថា ខ្លួនកំពុងរង់ចាំព័ត៌មានលម្អិតពីទីក្រុងវ៉ាស៊ីនតោនអំពីសំណើសុំបទឈប់បាញ់នៅអ៊ុយក្រែន ស្របពេលប្រភពជាន់ខ្ពស់នៅទីក្រុងមូស្គូបាននិយាយថា កិច្ចព្រមព្រៀងមួយនឹងត្រូវពិចារណាពីភាពរីកចម្រើនរបស់រុស្ស៊ី និងដោះស្រាយកង្វល់របស់ខ្លួន។

លោក Trump បាននិយាយថាបទឈប់បាញ់នឹងសមហេតុផលសម្រាប់រុស្ស៊ី ប៉ុន្តែក៏មានចំណុចអវិជ្ជមានជាច្រើនសម្រាប់រុស្ស៊ីផងដែរ ដោយពុំបានបញ្ជាក់លម្អិត។

លោកថាយើងមានស្ថានការណ៍ស្មុគស្មាញខ្លាំងក្នុងការដោះស្រាយជាមួយភាគីនីមួយៗ។យើងក៏បានពិភាក្សារឿងដីធ្លី និងរឿងផ្សេងទៀតដែលជាប់ពាក់ព័ន្ធនឹងបញ្ហានេះផងដែរ។

នៅពេលសួរថាតើលោកនឹងធ្វើអ្វីដើម្បីដាក់សម្ពាធលើរុស្ស៊ី លោក Trump បាននិយាយថាលោកអាចធ្វើរឿងជាច្រើនទាក់ទងនឹងហិរញ្ញវត្ថុ ដែលនឹងជះផលអាក្រក់ខ្លាំងដល់រុស្ស៊ី ។ យ៉ាងណា លោកមិនចង់ធ្វើបែបនេះទេ ព្រោះលោកចង់បានសន្តិភាព៕