មេដឹកនាំកំពូលរបស់អ៊ីរ៉ង់ លោក Ayatollah Ali Khamenei កាលពីថ្ងៃពុធសប្ដាហ៍នេះ បានទាត់ចោលការចរចាជាមួយសហរដ្ឋអាមេរិក ជុំវិញកិច្ចព្រមព្រៀងនុយក្លេអ៊ែរ ខណៈលិខិតមួយត្រូវបានបញ្ជូនពីប្រធានាធិបតីអាមេរិក Donald Trump ដែលអំពាវនាវឱ្យមានកិច្ចចរចាបែបនេះ។

កាលពីសប្តាហ៍មុន លោកTrump បាននិយាយថា លោកបានផ្ញើលិខិតនេះទៅលោក Khamenei ដែលស្នើសុំកិច្ចចរចានុយក្លេអ៊ែរ ប៉ុន្តែក៏បានព្រមានផងដែរថា "មានវិធីពីរយ៉ាងដែលអ៊ីរ៉ង់អាចដោះស្រាយបាននោះ គឺ យោធា ឬអ្នកធ្វើកិច្ចព្រមព្រៀង" ។   

លិខិតនេះត្រូវបានប្រគល់ជូនរដ្ឋមន្ត្រីការបរទេសអ៊ីរ៉ង់ លោក Abbas Araqchi កាលពីថ្ងៃពុធសប្ដាហ៍នេះ ដោយលោក Anwar Gargash ទីប្រឹក្សាការទូតរបស់ប្រធានាធិបតីអារ៉ាប់រួម។

ប្រព័ន្ធផ្សព្វផ្សាយរដ្ឋបានរាយការណ៍ថា ស្របពេលលោក Araqchi និងលោក Gargash កំពុងជួបប្រជុំគ្នា លោក Khamenei បានប្រាប់ក្រុមនិស្សិតសាកលវិទ្យាល័យថា ការផ្តល់ជូនរបស់លោក Trump សម្រាប់កិច្ចពិភាក្សា គឺជា "ការបោកប្រាស់" ។

លោក Khamenei ត្រូវបានដកស្រង់សម្តីដោយប្រព័ន្ធផ្សព្វផ្សាយរដ្ឋថា នៅពេលយើងដឹងថាពួកគេនឹងមិនគោរពទៅហើយនោះ តើនៅមានចំណុចអ្វីសម្រាប់ការចរចាទៀត? ។លោក Khamenei បាននិយាយថា លោកពុំទាន់បានឃើញលិខិតនោះនៅឡើយទេ។  

លោក Khamenei បាននិយាយថា ការចរចាជាមួយរដ្ឋបាលលោក Trump ដែលលោកបាននិយាយថាមានការទាមទារហួសហេតុ "នឹងរឹតបន្តឹងការដាក់ទណ្ឌកម្ម និងបង្កើនសម្ពាធលើអ៊ីរ៉ង់"។

ក្នុងឆ្នាំ ២០១៨ លោក Trump បានដកសហរដ្ឋអាមេរិកចេញពីកិច្ចព្រមព្រៀងនុយក្លេអ៊ែរឆ្នាំ ២០១៥របស់ទីក្រុងតេអេរ៉ង់ជាមួយមហាអំណាចពិភពលោក និងបានដាក់ទណ្ឌកម្មឡើងវិញដែលបានធ្វើឱ្យសេដ្ឋកិច្ចរបស់ប្រទេសអ៊ីរ៉ង់ចុះខ្សោយ។អ៊ីរ៉ង់ និយាយថា ខ្លួននឹងមិនចូលតុចរចាជាមួយអាមេរិក ក្រោមសម្ពាធ ការចាញ់ប្រៀប និងការបំភិតបំភ័យឡើយ៕