តុលាការធម្មនុញ្ញកូរ៉េខាងត្បូង បាននិយាយថា ខ្លួននឹងប្រកាសសាលក្រមនៅថ្ងៃព្រហស្បតិ៍ (១៣ មីនា) នេះ ក្នុងសវនាការចោទប្រកាន់ទម្លាក់តំណែងលើប្រធានសវនកររដ្ឋ និងរដ្ឋអាជ្ញា ៣រូប ដែលរឿងនេះបង្ហាញពីភាពមិនច្បាស់លាស់មួយទៀតនៅក្នុងក្ដីចោទប្រកាន់ទម្លាក់តំណែងលោកប្រធានាធិបតី Yoon Suk-yeol ខណៈមានការរំពឹងទុកយ៉ាងខ្លាំងថា សាលក្រមរបស់តុលាការលើមេដឹកនាំដែលត្រូវផ្អាកពីអំណាចរូបនេះ នឹងត្រូវពន្យារពេលទៅសប្ដាហ៍ក្រោយ។

អ្នកវិភាគផ្នែកច្បាប់កូរ៉េខាងត្បូងមួយចំនួនគិតថា តាមរយៈការសម្រេចចិត្តដំបូងពាក់ព័ន្ធនឹងសំណុំរឿងនេះ តុលាការធម្មនុញ្ញអាចនឹងលុបចោលបទចោទជាច្រើនករណីជុំវិញភាពអយុត្តិធម៌នានា។ នេះហាក់បីដូចជាប្រាប់ថា សាលក្រមរបស់តុលាការក្នុងការកាត់ក្តីចោទប្រកាន់ទម្លាក់តំណែងរបស់លោក Yoon នឹងមិនធ្វើឡើងនៅថ្ងៃសុក្រសប្ដាហ៍នេះ ដូចដែលមនុស្សជាច្រើនបានរំពឹងទុកនោះទេ។

ទោះជាតុលាការធម្មនុញ្ញបាននិយាយនៅដើមដំបូងនៃការកាត់ក្តីចោទប្រកាន់ទម្លាក់តំណែងនេះថា សំណុំរឿងរបស់លោក Yoon គឺជាអាទិភាពចម្បងរបស់ខ្លួនក៏ដោយ ក៏ប៉ុន្តែស្ថាប័នយុត្តិធម៌នេះក៏និយាយថា ខ្លួននឹងប្រកាសសេចក្តីសម្រេចតាមលំដាប់លំដោយ ដែលសំដៅទៅការអូសបន្លាយរយៈពេល។

អតីតអ្នកវិភាគរបស់តុលាការម្នាក់បាននិយាយថា “តុលាការធម្មនុញ្ញមិនដែលចេញសាលក្រមពីរថ្ងៃជាប់ៗគ្នាទេ ដូចនេះការកាត់ទោសនៅក្នុងក្ដីចោទប្រកាន់ទម្លាក់តំណែងរបស់លោក Yoon ទំនងជាត្រូវបានពន្យារពេលទៅដល់សប្តាហ៍ក្រោយ"៕