រដ្ឋមន្ត្រីការបរទេស នៃប្រទេសមានសេដ្ឋកិច្ចរីកលូតលាស់ទាំង៧ (G7) បានជួបប្រជុំគ្នានៅក្នុងប្រទេសកាណាដា កាលពីថ្ងៃពុធ ដើម្បីពិភាក្សាអំពីចំណាត់ការដើម្បីបញ្ឈប់សង្គ្រាមរុស្ស៊ី-អ៊ុយក្រែន ប៉ុន្តែរដ្ឋមន្ត្រីការបរទេសសហរដ្ឋអាមេរិក លោក Marco Rubio បានច្រានចោលសំនួរជាច្រើនអំពីទស្សនៈដែលអាមេរិកចង់ធ្វើជាម្ចាស់ផ្ទះនៃប្រទេសរៀបចំកិច្ចប្រជុំ។

លោក Rubio បានធ្វើដំណើរទៅកាន់ទីក្រុងកេបិច ប្រទេសកាណាដា បន្ទាប់ពីបានជួបជាមួយមន្ត្រីអ៊ុយក្រែននៅទីក្រុង Jeddah ប្រទេសអារ៉ាប៊ីសាអ៊ូឌីត ដើម្បីពិភាក្សាអំពីបទឈប់បាញ់ដំបូង។

លោកបាននិយាយថាលោកចង់ឱ្យក្រុមនៃលទ្ធិប្រជាធិបតេយ្យឧស្សាហកម្មទទួលស្គាល់ថា «សហរដ្ឋអាមេរិក បានធ្វើរឿងដ៏ល្អសម្រាប់ពិភពលោក» បន្ទាប់ពីទីក្រុង Kyiv បានគាំទ្របទឈប់បាញ់រយៈពេល៣០ថ្ងៃ ដែលស្នើឡើងដោយសហរដ្ឋអាមេរិក ជាមួយរុស្ស៊ី។ ពេលនេះយើងទាំងអស់គ្នាកំពុងរង់ចាំការឆ្លើយតបរបស់រុស្ស៊ី យ៉ាងអន្ទះសារ។ ប្រធានាធិបតីអ៊ុយក្រែន លោក Volodymyr Zelenskyy បាននិយាយថា សហរដ្ឋអាមេរិក នឹងចេញនូវការឆ្លើយតប «ខ្លាំងៗ» និងដាក់សម្ពាធលើទីក្រុងមូស្គូ ប្រសិនបើទីក្រុងនេះ មិនយល់ព្រមក្នុងការបញ្ឈប់ជម្លោះដែលបានឆក់យកជីវិតមនុស្សរាប់ម៉ឺននាក់។ វិមានក្រឹមឡាំង នៅក្នុងការធ្វើអធិប្បាយដំបូងរបស់ខ្លួនលើសំណើនេះបាននិយាយថា ខ្លួនកំពុងរង់ចាំព័ត៌មានលម្អិតពីទីក្រុងវ៉ាស៊ីនតោន។

លោក Rubio ជាមន្ត្រីជាន់ខ្ពស់អាមេរិកដំបូងគេដែលបានទៅបំពេញទស្សនកិច្ចនៅប្រទេសកាណាដាចាប់តាំងពីប្រធានាធិបតីអាមេរិក លោក Donald Trump បានឡើងកាន់តំណែង។

ដំណើរទស្សនកិច្ចរបស់លោក ធ្វើឡើងនៅពេលដែលលោក Trump បន្តពិភាក្សាអំពីការដាក់បញ្ចូលប្រទេសកាណាដា ទៅជារដ្ឋសហរដ្ឋអាមេរិក ខណៈកើនឡើងសង្រ្គាមពាណិជ្ជកម្មដែលអាចធ្វើឲ្យសេដ្ឋកិច្ចប្រទេសកាណាដា ធ្លាក់ចូលទៅក្នុងវិបត្តិសេដ្ឋកិច្ច។