អ្នកនាំពាក្យក្រុមហាម៉ាស លោក Hazem Qassem កាលពីថ្ងៃពុធ (១២ មីនា) បានស្វាគមន៍ជំហានដកថយដ៏ជាក់ស្តែងរបស់លោកប្រធានាធិបតីអាមេរិក Donald Trump ចេញពីសំណើរបស់លោកសម្រាប់ការផ្លាស់ទីលំនៅអចិន្ត្រៃយ៍របស់ពលរដ្ឋប៉ាឡេស្ទីននៅតំបន់ហ្កាហ្សា ដោយជំរុញឱ្យលោកបដិសេធមិនស្របតាមចក្ខុវិស័យនៃ "សិទ្ធិជ្វីហ្វជ្រុលនិយម" របស់អ៊ីស្រាអែល។

សេចក្តីថ្លែងការណ៍របស់មន្ត្រីក្រុមហាម៉ាសនេះ បានធ្វើឡើងបន្ទាប់ពីលោក Trump បានលើកឡើងកាលពីថ្ងៃពុធថា "ពុំមាននរណាម្នាក់កំពុងបណ្តេញប៉ាឡេស្ទីនចេញពីហ្កាហ្សាទេ" ជាការឆ្លើយតបទៅនឹងសំណួរមួយក្នុងអំឡុងពេលកិច្ចប្រជុំនៅសេតវិមាន ជាមួយលោកនាយករដ្ឋមន្រ្តីអៀរឡង់ Micheál Martin។

អ្នកនាំពាក្យក្រុមហាម៉ាស បាននិយាយថា "ប្រសិនបើសេចក្តីថ្លែងការណ៍របស់ប្រធានាធិបតីអាមេរិក Trump តំណាងឱ្យការដកថយពីគំនិតណាមួយនៃការផ្លាស់ទីលំនៅរបស់ប្រជាជននៅតំបន់ហ្កាហ្សាស្ទ្រីប នោះជំហាននេះត្រូវបានស្វាគមន៍យ៉ាងខ្លាំង"។

គួររម្លឹកថា កាលពីខែកុម្ភៈ លោក Trump បានស្នើឱ្យសហរដ្ឋអាមេរិក ជាអ្នកកាន់កាប់តំបន់ហ្កាហ្សា ជាទីដែលការវាយលុកដោយយោធារបស់អ៊ីស្រាអែល ក្នុងរយៈពេលប្រមាណ ១៧ខែចុងក្រោយនេះ បានសម្លាប់មនុស្សរាប់ម៉ឺននាក់ ហើយលោកក៏បានស្នើឱ្យអ្នកស្រុកប៉ាឡេស្ទីននៅក្នុងតំបន់ហ៊ុមព័ទ្ធនេះ "គួរតែត្រូវបានផ្លាស់ទីលំនៅជាអចិន្ត្រៃយ៍"៕